Roŭna 30 hadoŭ tamu va Ukrainie niekalki miljonaŭ čałaviek vyjšli na vulicy i ŭtvaryli žyvy łancuh.
Heta važnaja padzieja, jakaja była adnym ź ćvikoŭ u trunie savieckaj pačvary. Vidavočna, što ŭdzielnikaŭ ukrainskaha łancuha natchniała padobnaja akcyja ŭ krainach Bałtyi, ale toje, jak prachodziła akcyja va Ukrainie, vydatna adlustroŭvała toje, što šlach novaj niezaležnaj dziaržavy nie budzie prosty. I pakazała, nakolki pytańni identyčnaści važnyja pry dziaržaŭnym budaŭnictvie.
Akcyja adbyłasia pa linii Ivana-Frankoŭsk — Lvoŭ — Ciarnopal — Roŭna — Žytomir — Kijeŭ. Byli idei, kab zrabić žyvy łancuh dalej na ŭschod, da Charkava i Daniecka, ale arhanizatary byli realistami: jany razumieli, što sabrać ludziej na ŭschod ad Kijeva było nierealna, bo nasielnictva tam było pieravažna abyjakavym. Bolš za toje, byli ciažkaści navat z tym, kab zrabić narmalny łancuh u Žytomirskaj i Kijeŭskaj vobłaści: čarada tam była vielmi redkaja, ludzi stajali ŭ intervale dziasiatkaŭ mietraŭ adzin ad adnaho, tamu sapraŭdnaha łancuha tam i nie ŭtvaryłasia. I heta pry tym, što tudy na aŭtobusach padvozili ludziej z zachodnich abłaściej, ale navat jany nie ratavali situacyi.
Na Haliččynie i na Vałyni situacyja była inšaja: ludzi stajali ščylnymi radami, navat u hłuchich vioskach, łancuh nie pieraryvaŭsia, u niekatorych miescach ludzi stajali łancuhom u niekalki radoŭ.
Takaja krychu sumnaja ilustracyja taho, što dziaržava moža narmalna funkcyjanavać tolki tady, kali miežy jaje kultury i identyčnaści supadajuć ź dziaržaŭnymi miežami. Sumna, ale va Ukrainie jany nie supadali.
Dziaržava z hramadzianami bieź identyčnaści i kaštoŭnaściej heta jak čałaviek biez chrybietnika.
Mieŭ honar razmaŭlać ź niekalkimi udzielnikami taho łancuha. I dumki ŭ ich samyja roznyja. Chtości narakaje, što było stolki nadziej, jakija nie spraŭdzilisia. Čuŭ ja i adkryta sieparatysckija pohlady na Haličynie ŭ styli «chaj by hety łancuh byŭ da Roŭna i Ciarnopala, a nie da Kijeva, lepš by my sami biez hetych saŭkoŭ žyli». Sumna takoje čuć, ale ź pieśni słoŭ nie vykinieš. Ale hałoŭnaje inšaje: ideały ŭdzielnikaŭ taho łancuha praciahvajuć žyć, i Ukraina praciahvaje žyć. Z čym i vinšuju!
***
U sučasnaj Ukrainie 22 studzienia adznačajecca Dzień sabornaści. Data prymierkavana da padpisańnia ŭ 1919 hodzie Aktu ŭźjadnańnia Ukrainskaj Narodnaj Respubliki i Zachodnie-Ukrainskaj Narodnaj Respubliki ŭ adzinuju ŭkrainskuju dziaržavu.
Šanavać svabodu słova, spyniacca na čyrvonaje i nie pić za rulom: Zialenski znoŭ aryhinalna pavinšavaŭ ukraincaŭ VIDEA
