U centry Minska 23 studzienia adkryjecca interaktyŭny «Muziej čałavieka». Jaho ekspazicyi raźmieściacca na cokalnym paviersie Pałaca Respubliki i buduć uklučać bolš za 70 ekspanataŭ — ad dahistaryčnych raskopak dynazaŭraŭ da imitacyi kryvianosnaj sistemy. Nie abydziecca i biez technałohij pašyranaj realnaści.
Muziej zaniaŭ kala 600 «kvadrataŭ» na miescy načnoha kłuba «Centr», a patrapić u jaho možna z boku Kastryčnickaj płoščy. Prastoru padzialili na tematyčnyja zony. Ekspanaty sabrany z usiaho śvietu, a niekatoryja vyrableny ŭ Biełarusi.
U muziei ŭ niezvyčajnaj formie raskažuć, jak uładkavany čałaviečy arhanizm. Samym darahim ekspanatam stanuć dahistaryčnyja raskopki dynazaŭraŭ i tryłabitaŭ. Dzieci zmohuć adčuć siabie archieołahami i svaimi rukami ździejśnić maleńkaje navukovaje adkryćcio. Mnohija ekspanaty dazvolać bolš daviedacca pra budovu čałavieka, žyvioł i inšych istot.
U muziei źbiaruć roznyja interaktyŭnyja atrakcyjony z navukovym padtekstam. U pryvatnaści, dla dziaciej budzie ściana-lipučka: treba budzie apranuć śpiecyjalny kaścium z klejkimi stužkami, padskočyć i prylipnuć da viertykalnaj pavierchni. A z dapamohaj admysłovaj paduški prapanujuć vymierać siłu svajho ŭdaru. Inšyja snarady dazvalajuć acanić spryt ruk i chutkaść reakcyi na niečakanyja dziejańni.
Jašče adna ŭstanoŭka dazvolić pačuć rytm serca: kali prykłaści palec da śpiecyjalnych datčykaŭ, jany pamierajuć puls čałavieka i vizualizujuć z dapamohaj barabana. Zaadno možna budzie padličyć svaju vahu ŭ pinhvinach, hałubach, janotach, zubrach i kažanach. Taksama ŭ muziei vizualizujuć rabotu sardečnaj sistemy: pakažuć, jak serca haniaje kroŭ pa sasudach.
U Muziei čałavieka taksama zapracuje kiniekt-zona, dzie prapanujuć pahulać abo paspaborničać u boŭlinh, baskietboł, tenis abo łyžnyja honki. Asobnaje miesca adviaduć pad VR-technałohii, dzie možna budzie vyvučyć bijałohiju ŭ šlemie virtualnaj realnaści. Pierad apuskańniem budzie navukovy majstar-kłas z zajmalnymi ekśpierymientami.
Usim naviedvalnikam ŭ muziei buduć vydavać kartki zdaroŭja: u ich možna budzie zapisać ułasnyja vymiareńni i źvieryć ich z narmatyvami. Muziej taksama budzie vykarystoŭvać technałohii dapoŭnienaj realnaści.
«U Biełarusi źjavicca pieršy paŭnavartasny bijamuziej dla siamiejnaj aŭdytoryi. My pakłapacilisia ab tym, kab jon byŭ univiersalnym: ekspazicyi zacikaviać jak dziaciej, tak i darosłych. Fokus zrobleny na interaktyŭnaści i novych technałohijach: možna budzie vyrazna pačuć rytm svajho serca, pravieryć chutkaść reakcyi i vizualizavać evalucyju žyvych istot. Ničoha padobnaha raniej u Minsku nie było», — adznačaje kiraŭnik «Muzieja čałavieka» Illa Kurašoŭ.
«Muziej čałavieka» raźličany na darosłych i dziaciej ad 5 hadoŭ. Adkryjecca jon 23 studzienia na cokalnym paviersie Pałaca Respubliki. U pieršy dzień usim haściam buduć razdavać sałodkija padarunki.
