«Naša Niva» tradycyjna nazyvaje ludziej, dziakujučy jakim hety hod zapomnicca i ŭvojdzie ŭ historyju.
A vy kaho nazvali b Asobaj hoda? Voś śpis kandydataŭ, jakich sioleta prapanavali žurnalisty NN:
Viartańnie hoda — Kastuś Kalinoŭski
Vuličnych akcyj ź bieł-čyrvonam-biełymi ściahami sioleta było niamała: i Dzień Voli ŭ Hrodnie, i antyintehracyjnyja śniežańskija pratesty. Ale ŭ pamiać mnohim urežacca padzieja, jakaja adbyłasia za miežami sučasnaj Respubliki Biełaruś. U kancy listapada ŭ Vilni pierapachavali pareštki Kastusia Kalinoŭskaha i inšych paŭstancaŭ 1863 hoda (absalutnaja bolšaść ź ich pachodzić ź Biełarusi).
Kalinoŭskaha znajšli vypadkova: apoŭzień prajšoŭsia pa hary Hiedymina, i z-pad vapny, hliny i piasku prajavilisia čałaviečyja pareštki. Mienavita tut carskija ŭłady rasstrelvali paŭstancaŭ. Siarod tych kostak dakładna znajšli Zyhmunta Sierakoŭskaha (apaznali pa siamiejnym piarścionku), a taksama Kastusia Kalinoŭskaha. Bolš za 150 hadoŭ miesca pachavańnia lidara paŭstańnia było nieviadomym.
Uličvajučy važnaść Kalinoŭskaha dla biełaruskaj historyi, pradstaŭniki intelihiencyi prasili pachavać jaho ŭ Minsku, ale rašeńnie było pryniataje na karyść Vilni. Jakim było ździŭleńnie, što a 12-j hadzinie pracoŭnaha dnia płošča kala Kafiedralnaha sabora ŭ Vilni patanuła ŭ bieł-čyrvona-biełych ściahach. Litoŭskich i polskich była absalutnaja mienšaść. Biełarusy prademanstravali, što mienavita dla ich heta była važnaja i znakavaja padzieja.
Pachavalnaja pracesija pa starym horadzie ŭ Vilni pieraŭtvaryłasia ŭ šmattysiačnaje šeście ź bieł-čyrvona-biełymi ściahami. Kalinoŭski znajšoŭ spačyn na mohiłkach Rosy, na jaho trunie nadpisy na troch movach: biełaruskaj, litoŭskaj i polskaj. Historyja viartańnia Kalinoŭskaha — jaskravy prykład taho, jak hetaja histaryčnaja postać zdolnaja natchniać i praz šmat hadoŭ paśla śmierci.
Čytajcie taksama: «Naša Niva» nazvała ludziej hoda: Sieviaryncy
Spadarožnica hoda — Maryja Vasilevič
Karjera 22-hadovaj «Mis Biełaruś» Maryi Vasilevič imkliva papaŭzła ŭvierch, kali na letašnim navahodnim bali ŭ Pałacy Niezaležnaści jana stancavała z kiraŭnikom krainy. Potym Vasilevič stała supravadžać Łukašenku na samych roznych mierapryjemstvach: to na chakiei Alaksandr Ryhoravič pačubić Maryju za vałasy paśla zakinutaj šajby, to ŭ Białynickim rajonie ŭ kałhasie prapanuje sieści za kresła kiraŭnika.
U druhoj pałovie hoda niečakanaściu stała toje, što Vasilevič pajšła ŭ deputaty Pałaty pradstaŭnikoŭ. Jana bałatavałasia pa Kalvaryjskaj akruzie ŭ Minsku. Maryja adrazu stała razdražnialnikam dla mnohich. Naprykład, błohier Mikałaj Masłoŭski išoŭ na vybary pad łozunham «Prakocim Mašu Vasilevič». Za dziaŭčynu źbirali podpisy BRSM-aŭcy, a sama jana nie toje, kab aktyŭna ŭdzielničała ŭ kampanii. Tym nie mienš, deputacki mandat Vasilevič zajmieła. Praŭda, z samym małym pracentaŭ siarod usich kaleh pa cechu.
Cikava prasačyć za evalucyjaj Vasilevič. Ci budzie jana kamuści cikavaj užo ŭ nastupnym hodzie, ci zastaniecca miedyjnaj zorkaj. Mahčymyja lubyja varyjanty.
Błohier hoda — Niechta
Hod byŭ admietny rostam papularnaści telehram-kanałaŭ. Telehram siońnia — heta nie tolki srodak suviazi, ale i krynica infarmacyi. Na telehramaŭskija paviedamleńni ŭžo navat staŭ vymušany reahavać Alaksandr Łukašenka. Jahonaja pres-słužba pry dapamozie dziaržaŭnych žurnalistaŭ taksama pryjšli ŭ telehram, stvaryŭšy kanał «Puł Pieršaha».
Ale samaj admietnaj źjavaj hetaha siehmienta staŭ 21-hadovy Ściapan Puciła, jaki vybraŭ dla siabie šmatznačny psieŭdanim Niechta. Ściapan praz kryminalnuju spravu źjechaŭ z krainy, ciapier žyvie ŭ Polščy. Jon nie abmiažoŭvaje siabie ŭ krytycy ŭładaŭ, što mnohim vielmi padabajecca. Jahony film «Łukašenka. Kryminalnyja materyjały» doŭha trymaŭsia ŭ topie biełaruskaha jutuba, a potym byŭ pryznany ekstremisckim. Puciła navat sprabavaŭ vyvodzić ludziej na vulicy.
Papularnaść telehram-kanał Niechta (bolš za 180 tysiač čałaviek) nabraŭ paśla rezanansnaha samazabojstva milicyjaniera ŭ Mahilovie. Ściapan pieršym źliŭ infarmacyju pra zdareńnie ŭ siabie. Praŭda, jość u hetaha miedala i inšy bok. Časta ŭ kanale drukujecca chłuślivaja infarmacyja, jak było sa staršynioj Słonimskaha rajvykankama. Paśla čaho inšyja ŚMI, što davieryłasia Niechtu, byli vymušanyja zapłacić štrafy. Nu i kantent jaŭna prasieŭ paśla taho, jak za kratami apynuŭsia jaho pamahaty Uładzimir Čudziancoŭ.
Naziralnik hoda — Juryj Vaščančuk
Parłamienckija vybary adznačylisia nie tolki abrańniem Maryi Vasilevič i poŭnaj adsutnaści ŭ Pałacie apazicyjanieraŭ, ale i sumlennaj i samaaddanaj pracaj naziralnikaŭ. Centrvybarkam i inšyja pradstaŭniki ŭładaŭ śćviardžajuć, što falsifikacyj u nas niama. Na spravie ž na ŭčastkach ludzi sutykajucca z samym roznym.
Hetaja historyja adbyłasia ŭ Breście. Chłopiec-naziralnik Juryj Vaščančuk nie razhubiŭsia i źniaŭ na telefon, jak dziaŭčyna vychodziła z kabinki z cełym stosam biuleteniaŭ. Dziaŭčynu tuju zavuć Nastaśsia Kuličkova, jana pracuje psichołaham u dziciačym sadku. Cikava, što staršynioj kamisii na hetym učastku była zahadčyca taho samaha sadka.
I heta źjava vielmi raspaŭsiudžanaja ŭ bujnych haradach, kali na adnym učastku siadziać ludzi z adnoj i toj ža pracy, ale vysunutyja ad samych roznych partyj i arhanizacyj. Hetuju schiemu vyjaviŭ i raśpisaŭ kiraŭnik AHP Mikałaj Kazłoŭ.
Pra toje, što Vaščančuk ździejśniŭ varty ŭčynak, śviedčyć chacia b niervovaja reakcyja ŭładaŭ. «Pravakacyja» — heta było ci nie samaje miakkaje słova, jakoje ŭžyvałasia datyčna situacyi.
Avans hoda — Juryj Karajeŭ
Papiaredniaha ministra ŭnutranych spravaŭ Ihara Šunieviča nie lubiŭ nichto. Tut usio było ŭ sukupnaści: i haradavy, i dziravyja, i dekret ab darmajedach. Chiba što Lidzija Jarmošyna mahła pieraŭzychodzić Šunieviča ŭ takim sumniŭnym rejtynhu. U červieni Šunievič byŭ adpraŭleny ŭ adstaŭku. Jasnaja sprava, što na jaho fonie luby źmienščyk zdasca prosta hłytkom pavietra.
Juryj Karajeŭ, jaki pryjšoŭ u kresła ministra z pasady kamandujučaha ŭnutranami vojskami, schodu pačaŭ zadumvacca pra imidž struktury. Užo praz 100 dzion pracy Karajeva možna było kazać, što viedamstva stała bolš adkrytym i vietlivym. Novy ministr adrazu skazaŭ, što za zdymki z haradavym «ničoha nie budzie». I ŭvohule pakul u asobie Karajeva bačym milicyju «z čałaviečym tvaram». Razumiejem, što pakul rabić hłabalnyja vysnovy rana. Ale tendencyi na siońnia pazityŭnyja.
Revizor hoda — Michaił Babič
«Da pabačeńnia, naš łaskavy Miša, viartajsia ŭ svoj kazačny les». Zdajecca, paśla taho, jak pasoł Rasii ŭ Biełarusi Michaił Babič źjechaŭ nazad u Maskvu, takija kamientary mahli pisać pradstaŭniki i ŭładaŭ, i apazicyi. Nakont Babiča pazicyi va ŭsich byli adnolkavymi. Pasoł Babič za karotki čas zmoh pryciahnuć da siabie šmatlikuju narodnuju nieluboŭ i abureńnie.
Składvałasia ŭražańnie, što Babič pavodzić siabie ŭ Biełarusi, nibyta nie jon u haściach, a naadvarot. Jon kalasiŭ pa ŭsioj krainie, zajazdžaŭ na pradpryjemstvy, prymaŭ u siabie čynoŭnikaŭ i apazicyju («Havary praŭdu» ž jašče ličycca apazicyjaj?). U efiry BT padčas intervju jon tak raskidvaŭ nohi, što navat u mietro takoha menspredynhu vy mahli nie bačyć. Kali b Maskva nie adklikała Babiča, to praz paru miesiacaŭ heta mahło b skončycca dypłamatyčnym skandałam i departacyjaj Babiča. Jahony nastupnik — pasoł Mieziencaŭ — pavodzić siabie našmat bolš pryjazna da biełarusaŭ.
Miem hoda — abasranyja karovy
Pra toje, što kiraŭnik krainy Alaksandr Łukašenka vielmi časta naviedvaje «paciomkinskija vioski», havaryłasia ŭžo vielmi šmat i daŭno. Ale časam jahony maršrut usio ž adchilajecca ad zadadzienaha i tady pačynajuć adbyvacca samyja raznastajnyja rečy. Samy rezanansny vypadak adbyŭsia na SPK «Kupałaŭski» Škłoŭskaha rajona.
Łukašenka byŭ u šoku ad umovaŭ, u jakich utrymlivajucca karovy ŭ haspadarcy, jon navat paraŭnaŭ heta z kancłahieram. U vyniku praz «abasranych karovaŭ» u adstaŭku byŭ adpraŭleny staršynia Mahiloŭskaha abłvykankama, pamočnik pa Mahiloŭščynie, a taksama staršynia Škłoŭskaha rajvykankama. Nu a z «abasranymi karovami» stali paraŭnoŭvać nie tolki biełaruskuju sielskuju haspadarku, ale i ekanomiku ŭ cełym.
Pieramoha hoda — akumulatarny zavod u Breście
Fota euroradio.fm
U pačatku 2018 hoda žychary Bresta stali štoniadzielu vychodzić na centralnuju haradskuju płošču, kab pakarmić hałuboŭ. Zdavałasia b, zusim biaskryŭdnyja dziejańni, ale za ich zatrymlivali ludziej, sudzili, adpraŭlali na sutki. Sprava ŭ tym, što takim aryhinalnym čynam bieraściejcy vykazvalisia suprać ekałahična škodnaha akumulatarnaha zavoda, jaki paŭstaŭ na ŭskrajku horada.
Bieśpierapynnaja baraćba dała plon: zavod tak i nie zapracavaŭ. Jahony ŭłaśnik byŭ adpraŭleny pad vartu. I navat kiraŭnik krainy padčas naviedvańnia Bresta ŭ čas śviatkavańnia 1000-hodździa horada zaznačyŭ, što jon na baku ludziej.
Zmahańnie z zavodam skončyłasia nie tolki pieramohaj, jano adznačyłasia źjaŭleńnie ŭ paŭdniova-zachodnim abłasnym centry cełaha šerahu mocnych rehijanalnych lidaraŭ, ličycca ź jakimi ciapier daviadziecca ŭsim.
Pryznańnie hoda — Juryj Haraŭski
U apošni miesiac hoda infarmacyjnuju prastoru ŭzarvali pryznańni byłoha śpiecnazaŭca Juryja Haraŭskaha, jaki źjechaŭ žyć u niamieckamoŭnyja Alpy. Bajec kaža, što ŭdzielničaŭ u vykradańni i zabojstvie Juryja Zacharanki, Viktara Hančara i Anatola Krasoŭskaha. I choć Haraŭski mała čaho skazaŭ novaha, ale jahonyja słovy znoŭ pryciahnuli ŭvahu da spravaŭ 20-hadovaj daŭniny.
Dźmitryj Paŭličenka, jakoha Haraŭski nazyvaje niepasrednym vykanalnikam zabojstva, spačatku kazaŭ, što viedaje Haraŭskaha, potym, što nie viedaje, paśla — znoŭ, što viedaje. Tym nie mienš, Śledčy kamitet navat adnaviŭ kryminalnuju spravu Zacharanki. Cikava, ci daść Haraŭski ŭsio ž pakazańni ŭ sudzie?
Trahiedyja hoda — zabojstva ŭ Stoŭbcach
Fota svaboda.org
Hetaje zdareńnie ŭ nievialikim rajcentry Minskaj vobłaści ŭzbudaražyła ŭsiu krainu. Školnik zabiŭ nastaŭnicu historyi i inšaha školnika. Takoje zvyčajna možna pačuć pra ZŠA ci niejkuju inšuju krainu, ale kab tut u nas takoje zdaryłasia. Nieviadomyja matyvy taho zabojstva, nieviadoma, što zabojcu stuknuła ŭ hałavu. Ale dvaich ludziej nie stała. Zabojca atrymaŭ trynaccać hadoŭ kałonii.
Čytaj jašče: Čamu jon? Baćka chłopca, jakoha zabili ŭ Stoŭbcach, padrabiazna raskazaŭ pra syna i dzień jaho śmierci
Muzyka hoda — Maks Korž
Kaliści jon pačynaŭ śpiavać biełaruskamoŭny rep, ale ŭ jaho nie pavieryli. Jahonyja treki «Tata Łuniniec» i «Kraina maraŭ» usio jašče visiać na jutubie. Paśla hetaha Korž mocna pieraaryjentavaŭ svaju tvorčaść i vyjšaŭ pakul na niedasiahalnyja dla inšych biełaruskich muzykaŭ vyšyni.
Sioleta Korž daŭ vialiki solny kancert na stadyjonie «Dynama» (bilety raskupili zadoŭha da imprezy). Try z pałovaj hadziny tysiačy ludziej padpiavali za Karžom «Žyć u kajf», «Nieba dapamoža nam», «Hory pa kalena», «Aptymist» i šmat inšaha.
Korž — samy zakryty muzyka postsavieckaj prastory. Jon zusim nie daje intervju. Mała chto viedaje, što ŭ hałavie ŭ Karža. Tym nie mienš, kožnaj svajoj novaj pracaj jon padkreślivaje toje, što jon biełarus: to ŭ klipie milhanie bčb-ściah, to padručnik biełaruskaj movy, a to sami hieroi havorać pa-biełarusku.
Sychod hoda — Vasil Siomucha
Siarod mnostva śmierciaŭ hetaha hoda chočacca asablivuju ŭvahu źviarnuć na adychod pierakładčyka Vasila Siomuchi. Hety čałaviek adzin rabiŭ pracu cełaha instytuta. Siomucha pierakłaŭ na biełaruskuju Bibliju. Ale i heta było nie ŭsio, ceły šerah niamieckamoŭnych aŭtaraŭ, dziakujučy jamu zahučaŭ pa-biełarusku: Hiote, Šyler, Hofman, Nicše, Brecht, Hiese, Ziuskind i inšyja. Dziadźku Vasilu było 83 hady.
Funkcyjanier hoda — Alaksandr Zajcaŭ
U sporcie hod atrymaŭsia niebahatym na padziei. Nielha vyłučyć atletaŭ, jakija pakazali supierdobryja vyniki i prasłavili krainu. U hady, kali niama Alimpijadaŭ, tak byvaje časta. Zatoje ŭ futbolnym čempijanacie adbyłasia źmiena karala. Trynaccacihadovaja hiehiemonija BATE padyšła da skančeńnia razam ź śmierciu Kapskaha. Novy futbolny karol — «Dynama» (Brest).
Za pieramohaj bieraściejcaŭ staić charyzmatyčny biznesoviec Alaksandr Zajcaŭ, jaki ŭziaŭ kamandu ŭ składanyja časy, a ŭ vyniku zrabiŭ kamandu čempijonam. Da samoha Zajcava ŭ zaŭziatarskim asiarodździ nie samaje adnaznačnaje staŭleńnie, ale možna śmieła skazać, što jon zrabiŭ naš futboł bolš cikavym.
