Alaksandr Łukašenka 26 śniežnia zładziŭ vialiki kadravy dzień. U pieršuju čarhu heta tyčyłasia rajonnaj viertykali. Pra niekatorych z čynoŭnikaŭ — u tradycyjnym ahladzie «NN».
Ihar Markovič (Połacki rajon)
Ihar Markovič u centry.
Adzin sa staražyłaŭ uładnaj viertykali. Ihar Markovič uznačalvaŭ Vierchniadźvinski rajon na praciahu apošnich 12 hadoŭ. Daŭžej za jaho na siońnia na pasadach znachodziacca ŭsiaho try viertykalščyki: Volha Mocharava — u Dobrušy, Jan Vasileŭski — u Hrodnie i Mikałaj Arciuškievič — u Dziaržynsku.
Iharu Markoviču 59 hadoŭ, jon rodam ź vioski Nižniaje Famino kala Sarji Vierchniadźvinskaha rajona. U dziacinstvie, kazaŭ, siarod zachapleńniaŭ byli rovary i matacykły. U Ihara jość siastra, jana pracuje nastaŭnicaj ruskaj movy. Vučyŭsia ŭ sielskahaspadarčaj akademii ŭ Horkach pa śpiecyjalnaści «inžynier-miechanik». Šasnaccać hadoŭ adpracavaŭ načalnikam Vierchniadźvinskaha rajahraservisu.
Ihar Markovič maje dvaich synoŭ. Adzin ź ich žyvie ŭ Navapołacku, pracuje jurystam. Svoj styl kiraŭnictva jon nazyvaje «demakratyčnym». Pasada kiraŭnika Połackaha rajona stała vakantnaj paśla taho, jak były staršynia Mikałaj Šaŭčuk staŭ deputatam Pałaty pradstaŭnikoŭ.
Vasil Šyłaŭ (Vierchniadźvinski rajon)
Na miesca Ihara Markoviča, jaki pierajšoŭ staršynioj Połackaha rajvykankama, pryznačany jahony pieršy namieśnik Vasil Šyłaŭ. Mužčynu niama i 40 hadoŭ. Karaniami siamja Šyłavych z Tamboŭskaj vobłaści Rasii. Ale na Viciebščynu, u viosku Vałyncy, pierajechali, kali Vasil byŭ jašče zusim mały. Tut chadziŭ u sadok i škołu. Vučyŭsia ŭ Łužaśnianskim ahrarnym kaledžy i Horackaj sielskahaspadarčaj akademii. Potym pajšoŭ na pracu hałoŭnym ahranomam u rodnuju haspadarku «Prudniki».
«Nie ŭsio vymiarajecca hrašyma. I čaho šukać?! Padacca ŭ horad? Nu znojdzieš zarobak, a žyllo?.. Dy ŭsie ŭ harady i nie ŭlezuć. Kamuści patrebna być i na vioscy. A tut — maje baćki. Tut — maja siamja. Žonka Taćciana — sacyjalny rabotnik. Majem dvaich synoŭ. Arciomu chutka budzie try hady, a mienšamu Jahorku — paŭhodzika. Haspadarka vydzieliła nam dabrotny katedž. Kali zachočaš, žyć možna, prytym hodna i cikava», — kazaŭ jon u adnym intervju. Ale ŭ vyniku ŭsio ž padaŭsia ŭ rajonny centr.
Cikava, što ŭ Vasila i Taćciany Šyłavych adna na dvaich staronka ŭ sacyjalnaj sietcy «Adnakłaśniki». Niačasta takoje ŭbačyš.
Aleh Łyndzin (Tałačynski rajon)
Čynoŭniku 54 hady. Da apošniaha času jon uznačalvaŭ Dubrovienski rajvykankam, ale ŭ vieraśni adbyŭsia dastatkova ŭnikalny vypadak. Na pracu ŭ Dubroŭna viarnuŭsia były staršynia rajvykankama Anatol Łukašoŭ, jaki 3,5 hoda adbyŭ deputatam Pałaty pradstaŭnikoŭ. Łyndzin taksama zarekamiendavaŭ siabie niabłaha, tamu jamu chutka znajšli pracu niepadalok.
Łyndzin rodam ź nievialikaj vioski Žalezkava Dubrovienskaha rajona. Skončyŭ sielskahasadarčuju akademiju ŭ Horkach. Pracavaŭ hałoŭnym inžynieram u kałhasie «40 hadoŭ Kastryčniku». Byŭ staršynioj haspadarki «Jakubava-Ahra». Ad 2011 hoda — pieršy namieśnik staršyni Dubrovienskaha rajvykankama.
Siarhiej Dyluk (Naraŭlanski rajon)
Dyluka pieravodziać sa značnaha bolšaha Mazyra ŭ mienšuju Naroŭlu, ale na bolš vysokuju pasadu. U Mazyry Dyluk byŭ namieśnikam staršyni rajvykankama, adkazvaŭ za budaŭnictva. Na hetaj pasadzie adpracavaŭ vosiem hadoŭ.
Da hetaha času Siarhiej Dyluk uznačalvaŭ u Mazyry dziaržaŭnaje palihrafičnaje pradpryjemstva «Kałor». Navat traplaŭ u skandał, kali na miascovych vybarach 2010 hoda admoviŭsia drukavać ulotki apazicyjnaha kandydata Uładzimira Cielepuna, nie chacieła typahrafija vydavać ulotki i palitpryzyŭniku Franaku Viačorku.
Žonka Siarhieja Dyluka taksama pracuje ŭ rajvykankamie. Alena Ściapanaŭna Dyluk — hałoŭny śpiecyjalist upraŭleńnia pa pracy, zaniataści i sacyjalnaj abaronie. Dačka Darja ŭ 2015 skončyła BDTU, u tym samym hodzie pabrałasia šlubam.
Hienadź Šatujeŭ (Karelicki rajon)
Papiaredni staršynia Karelickaha rajvykankama Viktar Šejbak tajamniča źnik z pasady dzieści miesiac tamu. U roznych telehram-kanałach navat vykazvałasia mierkavańnie, što heta za ździajśnieńnie ŭčynku, jaki hańbić dziaržaŭnaha čynoŭnika, ale aficyjnaha paćviardžeńnia hetamu niama.
Na miesca Šejbaka ŭ Kareličy adpravili namieśnika staršyni Mastoŭskaha rajvykankama Hienadzia Šatujeva, jamu 45 hadoŭ. Šatujeŭ rodam ź vioski Malevičy Ščučynskaha rajona, vučyŭsia ŭ Hrodzienskim ahrarnym univiersitecie. Pracavaŭ bryhadziram małočnaj fiermy, hałoŭnym zaatechnikam u kałhasie. Ad 2005 hoda — u Mastoŭskim rajvykankamie, adkazvaŭ za sielskuju haspadarku.
Hienadź Šatujeŭ žyvie nie ŭ samich Mastach, a ŭ vioscy Pravyja Masty, što zusim pobač ad rajonnaha centra. Syn Hienadzia Jahor Šatujeŭ vučycca ŭ BNTU na enierhietyčnym fakultecie. Kali mierkavać pa jahonym instahramie, to chłopiec vialiki prychilnik kaljana, a taksama cytataŭ pra stasunki mužčyn i žančyn.
Adznačym jašče, što kiraŭnikom Ašmianskaha rajvykankama staŭ Uładzisłaŭ Hieršhoryn. Apošnija šeść hadoŭ Hieršhoryn byŭ namieśnikam staršyni Słonimskaha rajvykankama. Kuryravaŭ pytańni ekanamičnaha raźvićcia. Ahułam ža ŭ rajonnaj viertykali Hieršhoryn adpracavaŭ amal 20 hadoŭ. U svoj čas byŭ načalnikam adździeła pramysłovaści. Dačka Jana vučycca ŭ Słonimskaj himnazii.
