Adnaho aktyvista zvolnili, druhi padazraje, što za im sočać, jašče ŭ adnoj praciŭnicy zavoda na pracy prachodziać pravierki, piša Briestskaja hazieta.
Na aktyvistaŭ ruchu suprać budaŭnictva pad Brestam akumulatarnaha zavoda «AjPauer» paśla vybaraŭ uzmacniŭsia cisk. Pra heta paviedamiŭ adzin ź lidaraŭ ruchu bieraściejec Dźmitryj Biekaluk. U piatnicu 20 śniežnia jon napisaŭ zajavu ŭ Maskoŭski RAUS z prośbaj pravieści pravierku ŭ dačynieńni da pahroz, jakija pastupili na jaho adras z boku čałavieka, jaki nazyvaje siabie Vadzim M., u tym liku kanfiskavać techniku ŭ M. U hety ž dzień zajavu napisała i maci aktyvista, jakaja na minułym tydni znajšła ŭ paštovaj skryni samarobnyja ŭlotki, dzie havorycca, što jaje syn źjaŭlajecca niebiaśpiečnym dla žycharoŭ doma. Na dumku Biekaluka, da hetaha taksama moža być datyčny Vadzim M.
«Hety čałaviek pahražaŭ mnie i raniej. Letaś paśla zvankoŭ na žyvuju liniju da staršyni abłvykankama jon telefanavaŭ mnie i pradstaŭlaŭsia Dziedam Marozam. Potym pisaŭ na mianie zajavu, što ja dyskredytuju Respubliku Biełaruś — u dačynieńni da mianie pravodzili pravierku, parušeńniaŭ z majho boku nie znajšli. Hetaj vosieńniu jon pisaŭ mnie paviedamleńni, u jakich havaryłasia, što mnie «prałomiać hałavu», buduć «mačyć», išła havorka pra narkotyki. A ŭličvajučy, što ŭ našaha aktyvista Majsieja Maźko znajšli bojeprypasy, da jakich jon, jak było dakazana, nie maje nijakaha dačynieńnia, ja rasceńvaju heta jak pramuju pahrozu svajmu žyćciu i zdaroŭju», — raskazaŭ Dźmitryj Biekaluk.
Jon nahadaŭ, za niapoŭnyja dva hady baraćby cisnuli na šmatlikich aktyvistaŭ ruchu: Taćcianu Fiesikavu, jakuju zvolnili z pracy paśla mitynhu suprać zavoda, Majsieja Maźko, u mašynie jakoha znajšli bojeprypasy, zaviali kryminalnuju spravu, a potym zakryli jaje, Maryju Hałaluk, na jakuju sprabavali cisnuć praź jaje dziaciej, i dziasiatki inšych praciŭnikaŭ zavoda, jakich zatrymlivali, štrafavali za aktyŭnuju pazicyju pa zavodzie. Pa słovach Biekaluka, za apošni tydzień cisk na aktyvistaŭ aktyvizavaŭsia, ale ciapier sprabujuć uździejničać i praz svajakoŭ.
