Alaksandr Łukašenka pryhraziŭ pošukam alternatyŭnych pastaŭščykoŭ nafty i hazu, u vypadku kali Rasija vyznačyć zanadta vysoki košt na hetyja resursy. Pra heta jon skazaŭ u intervju radyjostancyi «Echo Moskvy».
«Jak možna arhanizavać ekanomiku, kali mnie kažuć: 152 dalary pavinna być cana na haz? Dy jana nie moža takoj być, bo my biez mytnaj pošliny handlujem. A na apošnich pieramovach ja naohuł skazaŭ, kali handal hety pajšoŭ, pa nafcie asabliva: dobra, davajcie vašyja ceny, my budziem płacić. Ale kali rasijski rynak u 25 młn ton nafty i ŭ 22 młrd kuboŭ hazu sydzie kudyści, vy na mianie nie kryŭdujcie», — zajaviŭ Łukašenka.
Paśla hetych słoŭ u Maskvie skazali, što sychod Biełarusi z rasijskaha rynku pryviadzie da taho, što nafta i haz buduć abychodzicca dla Minska daražej, dadaŭ Łukašenka. «A ja pryvioŭ prykład: kali vy pačali svarycca z Ukrainaj pa tranzicie hazu, što vy zrabili? Pabudavali abychod — Paŭdniovy i Paŭnočny patok. Heta dziasiatki miljardaŭ dalaraŭ. Tak što jašče nieviadoma, što budzie dalej. Ale vy plunuli i pačali heta rabić. Ja dakładna tak zrablu, Uładzimir Uładzimiravič. Ja budu šukać alternatyvu. A jaje ŭsio roŭna treba šukać. I ja heta ad kiraŭnictva Rasiei nie chavaju», — padkreśliŭ kiraŭnik Biełarusi.
U jakaści alternatyvy Łukašenka maje namier vykarystoŭvać reviers nafty. «Ja mahu praz Polšču, jany prapanujuć (heta samy tanny maršrut), uziać saudaŭskuju abo amierykanskuju naftu, što tańniej z rynku ŭ Hdańsku, i pa trubie zavieźci reviersam», - adznačyŭ jon.
Jak nahadaŭ Łukašenka, u Biełarusi try truby naftapravoda «Družba» z Rasijaj. «Na pieršym etapie ja zabiraju adnu trubu i reviersam pastaŭlaju naftu da nas na NPZ Paŭnočny i Paŭdniovy, a zatym pierapracoŭvaju. U hetym hodzie my całkam skončyli madernizacyju hetych NPZ, tam hłybinia pierapracoŭki, jak u Jeŭropie. Pojdzie narmalna, ja zabiaru reviersam druhuju trubu. U Rasii zastaniecca adna. Rasija pastaŭlaje pad 70 młn ton pa hetych trubach na premijalny zachodni rynak. Kali ja zabiaru 2 truby, u jaje zastaniecca niedzie 20 młn ton.
I ja zadaju pytańnie: vy navošta mianie zahaniajecie ŭ vyrašeńnie pytańnia takim čynam? Ja hetaha nie chaču», — padkreśliŭ kiraŭnik Biełarusi.
Łukašenka dadaŭ, što siabie respublika naftaj i tak zabiaśpiečvaje. «U nas zdabyvajecca prykładna 2 młn ton nafty. My ŭ lubym vypadku bienzabak lubomu biełarusu zaljem. Ale nam dla ekanomiki patrebna nafta — krychu bolš za 6 młn ton, kab całkam siabie zabiaśpiečyć. Ale my ŭ Rasii kuplajem 25 młn ton», - adznačyŭ jon.
Łukašenka taksama źviarnuŭ uvahu, što Biełaruś źjaŭlajecca trecim spažyŭcom rasiejskaha pryrodnaha hazu paśla Hiermanii i Italii. «Vy chočacie hety rynak stracić? Nie», — skazaŭ na zakančeńnie jon.
