U Nacyjanalnym aeraporcie Minska 18 śniežnia zatrymali 27-hadovaha žychara Homiela. Mužčyna płanavaŭ palacieć u Jerevan, ale nie prajšoŭ rehistracyju, bo znachodziŭsia ŭ vyšuku pa padazreńni ŭ asabliva bujnym machlarstvie, piša pres-słužba MKUS.
Z patencyjalnymi kredytorami jon paznajomiŭsia vosieńniu 2018 hoda i viasnoj 2019 hoda na internet-forumach: pradstaŭlaŭsia paśpiachovym biznesmenam i prapanoŭvaŭ supracoŭnictva. Pazyčalnik abiacaŭ viarnuć valutu i pracenty z prybytku, jakuju nibyta płanavaŭ atrymać u biznesie. U adnym vypadku — ad pastavak šklanoj pradukcyi ŭ Rasiju, u inšym - ad uhodaŭ na kryptarynku.
Paciarpiełyja — 30-hadovy minčuk i 29-hadovy mazyrčuk — pazyčyli jamu $ 48,5 tysiač. Ź ich słoŭ, ukłaścisia «ŭ spravu» ich zaachvociła žadańnie lohka zarabić, a fatahrafii padazravanaha z sacsietki (darahija kurorty, aksesuary, adzieńnie, rečy i h.d.) pierakonvali ŭ jaho prystojnym statusie. U vyniku mužčyny stali achviarami niachitraj afiory, a ich hrošy fihurant vydatkavaŭ na turpajezdki.
Kali nadychodziŭ abumoŭleny termin viartańnia hrošaj, małady čałaviek prasiŭ adterminoŭku i dadatkovuju pazyku pad bolšy pracent. Kab pierakanać kredytoraŭ u paśpiachovym raźvićci biznesu, adnojčy jon viarnuŭ im pa $ 5 tys. Praŭda, valuta była ŭziataja z pazyki adnaho z paciarpiełych.
U rešcie rešt, ašukanyja mužčyny źviarnulisia ŭ milicyju. Syščyki praviali pravierku i pieradali materyjały śledčym. Pa dadzienych faktach machlarstva byli raspačatyja kryminalnyja spravy. Daviedaŭšysia pra heta, padazravany vyrašyŭ schavacca za miažoj, ale byŭ zatrymany i źmieščany ŭ IČU.
P.S. Supracoŭniki kryminalnaha vyšuku, praviarajučy jaho dačynieńnie da padobnych złačynstvaŭ, vyjšli na žycharku Homiela. Pavodle jaje słoŭ, jana taksama paddałasia pierakanańniam ziemlaka, aformiła kredyt na $ 2 tys. i pieradała jamu hrošy. Zaraz hety fakt praviarajecca.
