Śviatłana Zavadzkaja, žonka źnikłaha ŭ 2000 hodzie aperatara rasiejskaha telekanału ORT Źmitra Zavadzkaha, prakamentavała Radyjo Svaboda pryznańnie Juryja Haraŭskaha, jaki kaža, što byŭ bajcom specyjalnaha atradu chutkaha reahavańnia (SOBR) Ŭnutranych vojskaŭ MUS Biełarusi pad kamandavańniem Dźmitryja Paŭličenki.
Były śpiecnazaviec: Ja ŭdzielničaŭ u zabojstvie Zacharanki i Hančara
«Šmat padobnych detalaŭ. Voś pra toje, što ŭ Hančara na nazie nie było dvuch palcaŭ, ja nia viedała. Ale ja zapytała ŭ Iryny Krasoŭskaj, pra heta i jana napisała, što pamiataje źviestki, nibyta ŭ łaźni Hančar chadziŭ u zakrytych humavych tapačkach. Ale ja ž sama hetaha nia bačyła, tamu bolš kazać nia budu. Ale kali heta praŭda, hetaja detal, to tady va ŭsio možna vieryć.
Mahu paraŭnoŭvać z tym, što raniej viedała. Sapraŭdy, bolšaść detalaŭ padobnaja. Navat pra toje, što Hančar i Krasoŭski byli zakapanyja na niejkaj zakrytaj terytoryi, na niejkaj bazie, a Dzimu (Zavadzkaha — R. S.) i Zacharanku pachavali na Paŭnočnych mohiłkach. Bo sa mnoj u 2010 hodzie źviazvaŭsia praź internet čałaviek, jaki siabie nie nazvaŭ, i jon kazaŭ, što bačyŭ niejkija dakumenty, u jakich byli ŭkazanyja miescy ich pachavańnia mienavita na Paŭnočnych mohiłkach. I ŭ interviju hetaha Haraŭskaha taksama — roznyja miescy pachavańnia Zacharanki dy Hančara z Krasoŭskim.
Potym — kroŭ Hančara, adkul jana ŭziałasia? Hety sobraviec kaža, što jon trapiŭ jamu pa tvary łancuhom, pabili škło. Ale ž hetak i było na miescy vykradańnia Hančara i Krasoŭskaha: i škło, i kroŭ, jakuju potym ekspertyza vyznačyła jak kroŭ mienavita Hančara. Dyk jak mnie aceńvać hetyja pakazańni? Albo hetak, što čałaviek dobra padrychtavaŭsia, kab atrymać palityčny prytułak na Zachadzie, albo sapraŭdy ŭsio tak i jość. Miarkuju, ciapier hetym musić zaniacca naš advakat, naš pradstaŭnik. Mahčyma, my zrobim asobnuju ci ahulnuju zajavu, i treba damahacca adnaŭleńnia spravaŭ pa znoŭ adkrytych abstavinach».
Pry hetym Śviatłana Zavadzkaja pakul nia viedaje, što dalej rabić sa źviestkami, jakija ahučyŭ Juryj Haraŭski, bo, na jaje dumku, u ciapierašniaj Biełarusi praviarać hetyja źviestki aficyjnaje śledztva nia stanie.
«Pry ciapierašniaj uładzie my z hetaj infarmacyjaj mała što možam zrabić. Mianie trasie, kali ŭsio heta čytaju, a ničoha nie mahu zrabić. Sprabuju niešta prydumać. Voś jon kaža, što moža ŭkazać miesca, dzie zabili Hančara i Krasoŭskaha. I što, kali my tudy pryjedziem, što budzie? Chto nam dazvolić tudy prajści? I ŭvohule ja pierakananaja, što ich cieły ŭžo nie znojdzieš.
Jak źniali Aleha Bažełku (były hieneralny prakuror — RS) i Mackieviča (były staršynia KDB — RS), dyk potym Pavał Šaramiet mnie raspaviadaŭ, što nibyta dajšła infarmacyja, što ŭsio ŭžo padčyścili. Navat Chrystas Purhurydes, (dakładčyk Parlamenckaj asamblei Rady Eŭropy — RS), kali zrabiŭ svajo raśśledavańnie, a jon byŭ daśviedčanym, zajmaŭsia źniknieńniami jašče na Kipry, kazaŭ nam, sychodziačy sa svajho dośviedu, što my nikoli nie znojdziem ciełaŭ svaich svajakoŭ.
Dakładna hetak: «Mnie strašna vam heta kazać, ale ciełaŭ vašych mužoŭ nikoli nie znojduć». U tym liku jon sychodziŭ z taho, jak reahujuć Navumaŭ i Sivakoŭ (kolišnija kiraŭniki MUS — RS), ź jakimi razmaŭlaŭ. Kazaŭ, što jany navat nie dadumalisia adkazvać adnolkava pra raśśledavańnie, nastolki byli ŭpeŭnienyja, što nichto ničoha nie znojdzie. Adzin kazaŭ, što zakazvali abstalavańnie dla pošuku, druhi abviarhaŭ heta, nibyta ničoha nie zakazvali. Purhurydes mierkavaŭ, što jany chłusili, i jaho heta pierakanała ŭ tym, što ciełaŭ užo niama».
