Načalnik Hienštaba, a ciapier deputat Pałaty pradstaŭnikoŭ Aleh Biełakonieŭ raskazaŭ karespandentu «Našaj Nivy» pra vyniki vizitu ŭ Biełaruś načalnika Hienštaba Italii Enca Viečyjareli.
Dahetul našu krainu naviedvaŭ tolki kiraŭnik Hienštaba Łatvii, ale Italija — inšy masštab, italjancy — adny ź lidaraŭ NATA.
Viečyjareli pryjechaŭ u Biełaruś na minułym tydni pa asabistym zaprašeńni Biełakonieva. Vajskoŭcy paznajomilisia ŭ Ńju-Jorku, dzie načalnik biełaruskaha Hienštaba vystupaŭ na adnoj z kanfierencyj pa pytańni miratvorčaj dziejnaści.
«U nas adna z zadač dziejnaści — raźvićcio dziejnaści ŭ ramkach miratvorčych sił AAN, u tym liku ŭ Livanie. Na siońnia my vykonvajem tam peŭnyja zadačy: biełarusy jość u strukturach zabieśpiačeńnia i ŭ miedycynskim piersanale. Dva našyja apieratyŭnyja aficery taksama tam.
I my abmiarkoŭvali sa spadarom Viečyjareli techničnyja pytańni, jakija treba ŭnieści ŭ dakumienty, kab i naš vajskovy kantynhient zmoh pajechać u składzie italjanskich sił u Livanie i vykonvać sumiesnyja zadačy ź sierbami, italjancami i palakami», — raskazaŭ Biełakonieŭ.
Jak jon patłumačyŭ, Biełaruś nie moža adpravić miratvorcaŭ u Livan, bo hetaje rašeńnie prymaje AAN. A kiraŭnik kantynhientu ŭ Livanie — Italija, usio zaležyć ad ich.
Naturalna, havorka idzie pra kantraktnikaŭ, a nie sałdat terminovaj słužby.
My taksama spytalisia ŭ načalnika Hienštaba takuju reč: jość Sierbija, jakaja siabruje i treniruje vojski i z Rasijaj, i z NATA. A kali my, biełarusy, dekłarujem u Kanstytucyi imknieńnie da niejtralitetu, to čamu tady pravodzim vučeńni tolki z adnoj siłaj — Rasijaj, i nie pravodzim ź inšaj — NATA?
«Biełaruś hatovaja da sumiesnych vučeńniaŭ z NATA, iduć navat pieramovy pra mahčymyja farmaty. Ale heta z toj umovaj, što NATA budzie razumieć: naš stratehičny sajuźnik — heta Rasija», — skazaŭ Biełakonieŭ.
