Supracoŭniki milicyi 28 listapada skłali administracyjny pratakoł na hramadskaha aktyvista z Drybina Andreja Jurkova. Jak paviedamiŭ sam Andrej Jurkoŭ u svaim fejsbuku, padstavaj dla składańnia pratakoła stała toje, što jon pastaviŭ dyzłajk pad materyjałam u sacyjalnaj sietcy «Adnakłaśniki».
«Vo blin! Dumaŭ, vybary skončylisia. A tut na tabie pratakoł! Šyjuć raspaŭsiud ekstremisckaj simvoliki. Na «Adnakłaśnikach» u stužcy pastaviŭ dyzłajk pad materyjałam, dzie paznačana, što pad nacysckim ściaham źniščana 35 miljonaŭ savieckich hramadzian. Nie śpiać damaroščanyja fašysty)», — piša Andrej Jurkoŭ u fejsbuku.
Andrej Jurkoŭ z vystaŭlenymi milicyjanierami abvinavačvańniami nie pahadziŭsia. Jon napisaŭ u pratakole, što ničoha nie raźmiaščaŭ na svajoj staroncy, a prosta pastaviŭ dyzłajk pad materyjałam.
Andrej Jurkoŭ — dobra viadomy ŭ Drybinie i Horkach hramadski aktyvist. Na parłamienckich vybarach 2019 hoda jon vyłučaŭsia kandydatam u deputaty Pałaty pradstaŭnikoŭ pa Horackaj vybarčaj akruzie №82. Zhodna aficyjnaj infarmacyi CVK, padčas hetych vybaraŭ za Jurkova addali svaje hałasy 3 554 vybarščyki, što składaje 7.21% ad ahulnaj kolkaści vybarščykaŭ akruhi.
