pxhere.com
Straty dachodnaj častki biudžetu Biełarusi ŭ 2020 hodzie ad spynieńnia «pieramytnioŭki» rasijskaj nafty składuć 951 młn rubloŭ (kala 423,6 młn dalaraŭ). Pra heta zajaviŭ pieršy namieśnik ministra finansaŭ krainy Juryj Sielivierstaŭ, piša Tut.by
«Straty ŭ paraŭnańni z 2019 hodam dachodaŭ ad pastupleńnia srodkaŭ ad tak zvanaj pieramytnioŭki składuć 951 młn rubloŭ», — skazaŭ jon paniadziełak u parłamiencie.
U tłumačalnaj zapiscy da prajektu biudžetu-2020 havorycca pra straty «ad spynieńnia terminu dziejańnia damoŭlenaściej z Rasijskaj Fiederacyjaj u naftahazavaj śfiery» na 950,9 młn rub.
Rasija ŭ 2017 hodzie z metaj kampiensacyi vysokich (na dumku biełaruskaha boku) cen na haz pradastaviła Biełarusi mahčymaść zaličać u svoj biudžet mytnuju pošlinu ad 6 młn ton nafty (tak zvanaja pieramytnioŭka). Heta «pahadnieńnie ab supracoŭnictvie ŭ naftahazavaj śfiery» dziejničaje pa 2019 hod uklučna. Ale na praciahu hetaha hoda biełaruskija čynoŭniki kazali, što viaduć pieramovy na pradmiet padaŭžeńnia damovy.
Juryj Sielivierstaŭ, adkazvajučy na pytańnie žurnalistaŭ, ci značyć heta, što Minsk i Maskva pa pytańni «pieramytnioŭki» nafty na 2020 hod nie damovilisia, skazaŭ: «Na dadzieny momant pakul tak».
Jak zajaviŭ Sielivierstaŭ, biudžet taksama paniasie straty «va ŭmovach narastańnia dziejańnia padatkovaha manieŭru ŭ naftavaj śfiery ŭ Rasijskaj Fiederacyi». Straty respublikanskaha biudžetu ad vyvaznych mytnych pošlin na naftapradukty składuć 537,2 młn rubloŭ (kala 239,3 młn dalaraŭ), adznačajecca ŭ dakumientach da prajektu biudžetu.
