Fota Uładzia Hrydzina
Adkryty list da Staršyni i Rady Biełaruskaha PEN-centra
Šanoŭnyja kalehi!
29 kastryčnika, pad noč rasstralanych paetaŭ, na pieršym paśla Źjezda pasiedžańni Rady Biełaruskaha PEN-centra častka jahonych siabroŭ skarystała, jak sposab dasiahnieńnia pažadanych vynikaŭ hałasavańnia Rady, naŭprostavy šantaž. Instrumient, jakim karystalisia i karystajucca ŭ biełaruskich śpiecsłužbach, ale nikoli nie karystalisia, va ŭsiakim razie na majoj pamiaci, u tvorčych abjadnańniach, u litaraturnych supołkach.
Ja pakidaju za dužkami toje, što siarod ludziej, jakija padpisalisia pad hetuju małaprystojnuju dzieju, byli nie hramadzianie Biełarusi, a značyć, nie čalcy Biełaruskaha PENa. Pakidaju za dužkami i toje, što ŭ praceduru TAJEMNAHA hałasavańnia było pryŭniesienaje daloka nie tajemnaje hałasavańnie telefonnaje. Ale sam fakt šantažu pakinuć za dužkami nie vypadaje.
Pa sutnaści, u ofisie na Załatoj Horcy adbyŭsia pakaz čarhovaj sieryi «Santa-Barbary» z kłasičnym naboram płačaŭ, isteryk, pahroz: «Ja ŭskryju vieny!..» — a nam davodziać, što tam adbyłosia pasiedžańnie Rady Biełaruskaha PEN-centra. Heta źnievažaje PEN, źnievažaje jahonych zasnavalnikaŭ, adnosiny da jakich adna z hieraiń sieryjału vykazała nie dvuchsensoŭna: «Ja myślu PEN nie jak spadčynu Bykava i Šermana…»
A ja myślu PEN mienavita tak. Jak spadčynu Bykava i Šermana, spadčynu najlepšaha, što było ŭ biełaruskaj litaratury, u asiarodku litarataraŭ — u tym liku spadčynu čałaviečaj prystojnaści. Vysakarodstva, jakoje b adpaviadała vysakarodnamu zaniatku litaraturaj.
Ja nie źbirajusia na šantaž adkazvać šantažom, zajaŭlać, što vyjdu z PENa razam z tymi, chto mianie padtrymlivaje. Ja nie źbirajusia viartacca ŭ kiraŭnictva PENa — hetaha mnie chapiła. Ale i pakidać PEN na skarystańnie hierojam mylnych opier ja taksama nie źbirajusia. Nadta šmat tam majho žyćcia.
Prašu staršyniu PENa sklikać čarhovuju Radu, pierahledzieć pastanovu, pryniatuju pad ciskam i hvałtam na pasiedžańni 29 kastryčnika, kab pryjści da ŭzvažanaha, adkaznaha, adpaviednaha zvańniu siabra Biełaruskaha PENa i pryzvańniu piśmieńnika, rašeńnia.
Ź niaźmiennaj pavahaj da usich, chto niasie ŭ sabie biełaruskaje mastackaje słova, hanarovy staršynia Biełaruskaha PEN-centra, —
Uładzimir Niaklajeŭ.
P.S. List padpisany taksama Hanarovym staršyniom PEN-centra Lavonam Barščeŭskim i adkryty dla padpisańnia usimi siabrami PEN-centra, u tym liku tymi, chto, moža być, padpisaŭsia pad «listom 36-ci», nie asabliva ŭnikajučy ŭ toje, što jon padpisvaje: nu, patelefanavali z PENa, paprasili padpisać, dyk čamu nie?..
