Andrej Chadanovič, były staršynia PEN-centru, ciapier siabra Rady PENa. Jon padrabiazna razabraŭ pretenzii Paŭła Sieviarynca.
Čytajcie. Pavieł Sieviaryniec: Chadanovič pryciahnuŭ u PEN-Centr ahresiŭnych fieministak i hiej-łobi, ale nie puskaje chryścijan
Andrej Chadanovič
«U hetym dopisie šmat emocyj. Jość fakty, a jość ich interpretacyi spadarom Sieviaryncam. A jość i prosta niapraŭda. Ad čałavieka, jaki braviruje imieniem viernika i časta źviartajecca da boskaha aŭtarytetu, chłuśniu čytać asabliva prykra.
Pra toje, što Chadanovič nibyta «pryciahnuŭ u arhanizacyju hrupu radykalnych adeptaŭ kulturnaha marksizmu — ahresiŭnych fieministak, hiej-łobi, ahitataraŭ lavactva».
Ja dumaju, što va ŭsie hetyja katehoryi spadar Sieviaryniec zapisvaje «niekansiervataraŭ», nie zhodnych ź im. Jon ščyra ździŭlajecca, što ŭ śviecie jość ludzi, jakija nie padzialajuć jaho krajniaha radykalizmu, jaho fanatyzmu, jaho hamafobii. I Sieviaryniec nazyvaje heta «hiej-łobi».
Sieviaryniec virtuozna karystajecca movaj nianaviści. Heta mnie taksama prykra čuć ad zasłužanaha apazicyjnaha palityka, ad čałavieka, jaki nazyvaje siabie piśmieńnikam.
Jašče jon pieryjadyčna nazyvaje maładych litarataraŭ «ateistami»… Heta prosta niapraŭda, bo ŭ Radzie PENa jość praktykujučyja vierniki, i bolšaść ź ich nie padzialaje levych pohladaŭ, choć kožny maje prava mieć svaje pohlady», — adkazaŭ Chadanovič.
Na dumku Chadanoviča, Sieviaryniec uzhadaŭ proźvišča adyjoznaha kamunista Andreja Łazutkina prosta tamu, što nie znajšoŭ inšaha sposabu ŭkazać na «lavactva» PEN-centru.
«Da Łazutkina ŭ PENie nichto nie maje simpatyj, chutčej, naadvarot. I Łazutkin — nie člen PENa. Tak, litaraturny debiut Łazutkina adbyŭsia pry dapamozie Škoły maładoha litaratara pry Sajuzie piśmieńnikaŭ, — nahadaŭ Andrej Chadanovič. — Ale ž Sieviaryniec ci to naŭmysna błytaje dźvie padziei, ci to ŭ jaho jany źmiašalisia ŭ hałavie. Pra dyskryminacyju ruskamoŭnych piśmieńnikaŭ ja vykazvaŭsia, kali abviaščałasia premija «Kniha hodu». I paśla za svaju niaŭdałuju farmuloŭku publična vybačaŭsia».
Taksama Sieviarynca aburyła, što ŭ PEN nie pryniali vialikuju kolkaść chryścijanaŭ.
«Sprava ŭ tym, što kali chacia b dva čałavieki z Rady PEN-centra znajomyja z tvorčaściu kandydata — čałavieka prymajuć u PEN. Ale pra tvorčaść 6 z tych 7 chryścijan-piśmieńnikaŭ nichto z Rady ničoha nie moh skazać. Tamu ŭziali paŭzu, kab aznajomicca z tvorčaściu pretendentaŭ, voś i ŭsio. Mnie zdajecca, heta narmalny pracoŭny momant», — raskazaŭ Chadanovič.
Jon prakamientavaŭ i vyklučeńnie z PENa Paŭła Sieviarynca.
«Sieviarynca vyklučyli nie adnaho, tam było niekalki čałaviek. Pryčyna — sistematyčnaja niaspłata siabroŭskich unioskaŭ.
Situacyja była takaja: jon nie płaciŭ, ale zastavaŭsia ŭ arhanizacyi i adkazvaŭ, što ŭnioski płacić nie budzie i nadalej, bo nie padzialaje talerantnuju pazicyju PENa adnosna seksualnych mienšaściaŭ», — skazaŭ Chadanovič.
Staršynia PEN-centra Taćciana Niadbaj admoviłasia kamientavać situacyju dla «NN». Jana patłumačyła, što raniej vykazvałasia pa hetaj temie na «Radyjo Svaboda» i na «Biełsacie», a taksama spasłałasia na toje, što «NN» nibyta skažaje jaje kamientary.
Jaje pieršy namieśnik Pavieł Ancipaŭ taksama nie staŭ kamientavać situacyju.
