«Mis Biełaruś — 2018» Maryju Vasilevič zarehistravali kandydatkaj u deputaty.
— Tak, ja zarehistravanaja, — paviedamiła Vasilevič Tut.by.
Kiraŭnica CVK Lidzija Jarmošyna raniej vykazałasia nakont žadańnia Vasilevič pajści ŭ deputaty.
— Dumaju, nasielnictvu heta spadabajecca. Adzinaje što, u mianie asabistaja pazicyja jak vybarščyka i dziaržaŭnaha čynoŭnika, u deputaty pavinny iści ludzi stałyja, — skazała Jarmošyna.
U 2018 hodzie Maryja Vasilevič vyjhrała konkurs «Mis Biełarusi». Na konkursie «Mis śvietu — 2018» jana atrymała tytuł «Mis śvietu Jeŭropa» i ŭvajšła ŭ finale ŭ top-5 udzielnic. Heta najlepšy vynik za ŭsiu historyju ŭdziełu našaj krainy ŭ hetym konkursie.
Akramia taho, Vasilevič niaredka źjaŭlajecca na mierapryjemstvach z udziełam Łukašenki.
Maryi Vasilevič 22 hady, jana skončyła BDEU, stała mieniedžaram-ekanamistam, pastupiła ŭ mahistraturu. Maryła stać televiadučaj i sioleta ŭ mai vyjšła ŭ efir «Dobraj ranicy, Biełaruś».
