Fota Ramana Pratasieviča
Sa Źmitra Palijenki, sprava jakoha razhladajecca siońnia ŭ Minskim haradskim sudzie, źniali abvinavačvańni pa troch kryminalnych artykułach: za «abrazu pradstaŭnika ŭłady», «raspalvańnie rasavaj, relihijnaj ci inšaj sacyjalnaj nianaviści albo varožaści» i «apahańvańnie budynkaŭ i naniasieńnie škody majomaści», paviedamlaje Jeŭraradyjo.
Hetaha, darečy, patrabavała pravaabarončaja arhanizacyja Amnesty International, jakaja razhledzieła spravu i pryjšła da vysnovy, što hetyja try abvinavačvańni źjaŭlajucca niezakonnymi i musiać być źniatyja.
Paśla abieda, vierahodna, adbudziecca dopyt abvinavačanaha. Ciapier Palijenku buduć sudzić za «złosnaje chulihanstva». Aktyvist nibyta pyrsnuŭ u tvar nieznajomamu mužčynu piarcovym bałončykam za zaŭvahu pra paleńnie ŭ padjeździe.
Padčas dopyta paciarpieły raspavioŭ, jak heta było. Akazvajecca, jon byŭ vypiŭšym, i ŭ milicyju źviarnuŭsia praz dvoje sutak.
«Ja nie palu i nie lublu hety pach. Išoŭ dadomu, zrabiŭ zaŭvahu chłopcu, jaki paliŭ u padjeździe Raptam mnie ŭ tvar raspylili haz. Ja pierastaŭ bačyć. Pryjšoŭ dadomu i vymyŭ tvar. Heta było kala vośmaj viečara. Dahetul ja sustrakaŭsia ź siabram, vypiŭ krychu piva i potym 300 hramaŭ harełki. Doma žonka chacieła vyklikać chutkuju, ale ŭ mianie z chutkaj svaje adnosiny. U milicyju źviarnuŭsia praź dzień. Dla asensavańnia taho, što adbyłosia, spatrebiłasia dvoje sutak».
Palijenku pahražaje abmiežavańnie svabody na termin ad troch da piaci hadoŭ albo pazbaŭleńnie voli ad troch da dziesiaci hadoŭ.
