Redaktar «RIA Novosti» Śviatasłaŭ Paŭłaŭ padaŭ zajavu ŭ Śledčy kamitet Rasii z-za žorstkaha abychodžańnia padčas kursaŭ ekstremalnaj žurnalistyki «Bastyjon», abaviazkovych dla atrymańnia akredytacyi ŭ siłavikoŭ, piša «Miediazona». Biez prachodžańnia hetych kursaŭ rasijskich žurnalistaŭ i prapahandystaŭ nie puskajuć u haračyja punkty.
Kursy prachodzili ŭ vieraśni na terytoryi vajskovaj čaści, dzie znachodzicca 810-ja hvardziejskaja bryhada marskoj piachoty Čarnamorskaha fłotu VMF Rasii ŭ anieksavanym Sievastopali. Razam z Paŭłavym tam byli niekalki dziasiatkaŭ inšych žurnalistaŭ i prapahandystaŭ.
Redaktar raskazaŭ, što atrymaŭ traŭmy padčas demanstracyjnaha zachopu załožnikaŭ, jaki adbyŭsia raptam padčas adnoj ź lekcyj. Pa słovach žurnalista, marpiechi ŭvarvalisia i pakłali ŭsich tvaram u padłohu. Jamu ŭdałosia vyrvacca z budynka, adnak adzin z vajskoŭcaŭ viarnuŭ jaho nazad, supravadžajučy svaje dziejańni matam, udarami i abrazami.
Paśla hetaha słuchačam kursa nadzieli na hałavu miaški, jakimi pieryjadyčna dušyli. Zatym žurnalistaŭ i prapahandystaŭ pahruzili ŭ aŭtobusy i pavieźli na palihon. U aŭtobusie ŭdary i ździeki praciahvalisia.
Taksama ich prymušali poŭzać pa kamianiach i bili. Kali Paŭłaŭ pačaŭ zadychacca ŭ miašku i stračvać prytomnaść, jamu skazali, što jon zabity.
«I dalej pajšli astatnich katavać, dzieści paŭhadziny. Ich palivali baranovaj kryvioju, stralali nad hałovami, prymušali skakać-adciskacca — karaciej, niejkaje poŭnaje piekła», — raspavioŭ rasijski prapahandyst.
Paśla zachopu ŭ Paŭłava kanstatavali zakrytuju čerapna-mazhavuju traŭmu, šmatlikija rany tvaru, tułava, kaniečnaściej, udar miakkich tkanak hrudnoj kletki i kalennych sustavaŭ, a taksama padazreńnie na strasieńnie mozhu. Adnoj z udzielnic kursaŭ parvali vucha, inšamu adbili nyrki.
Paŭłaŭ śćviardžaje, što vajskoŭcy nie adrazu pahadzilisia akazać žurnalistam miedycynskuju dapamohu. Jon i niekalki inšych udzielnikaŭ «Bastyjona» pakinuli kurs daterminova.
Prapahandystaŭ i žurnalistaŭ pasialili ŭ kazarmie, prymušali šychtavać, zabaraniali pakidać terytoryju čaści. Nichto zahadzia nie papiaredžvaŭ pra formu i źmiest kursaŭ.
