Fota: Raman Cymbaluk, UNIAN.
Dniom 29 vieraśnia ŭ Maskvie prachodzić ŭzhodnienaja akcyja ŭ padtrymku asudžanych i abvinavačanych pa «maskoŭskaj spravie» i suprać palityčnych represij u Rasii.
Na akcyju pryjšli kala 20 tysiač čałaviek, piša Radyjo «Svaboda». Tradycyjna miesca praviadzieńnia akcyi ačeplena mietaličnaj aharodžaj, prachod — tolki praź mietaładetektary.
Na mitynh pryjšoŭ Alaksiej Navalny. Pavodle jaho, mitynh — adzin z krokaŭ na šlachu da stvareńnia ŭ Rasii masavaha ruchu za vyzvaleńnie palitviaźniaŭ
«Patrabavańni našy pavinny być nastupnymi: pa-pieršaje, nie prosta adpuścić pad umoŭny termin, a spynić kryminalny pieraśled nievinavatych ludziej pa «maskoŭskaj spravie», — cytuje currenttime.tv adnu z pramovaŭ, jakaja hučała na akcyi.
Pratesty ŭ padtrymku kandydataŭ, jakim admovili ŭ rehistracyi na vybary ŭ Mashardumu, praciahvalisia ź siaredziny lipienia. «Maskoŭskaja sprava» — heta sprava ab byccam by «masavych biesparadkach» na mitynhu 27 lipienia. Tady zatrymali 1388 čałaviek, siarod jakich byli 76 niepaŭnaletnich. Abvinavačvańni ŭ «masavych biesparadkach» i «ŭžyvańni hvałtu da pradstaŭnika ŭłady» atrymali kala 20 čałaviek, usie — mužčyny, bolšaści niama 30 hadoŭ.
Pad hvałtam śledstva razumieła takija dziejańni, jak kidańnie papiarovym kubačkam u bok palicejskaha, sproba sarvać šlem z rashvardziejca. Pa hetych artykułach fihuranty «maskoŭskaj spravy» mahli atrymać ad troch da piaci, vaśmi ci navat 10 hadoŭ kałonii.
Paźniej byli spynienyja spravy suprać piacioch fihurantaŭ, abvinavačvańni suprać inšych pierakvalifikavali na bolš «lohkija» artykuły.
