Siarhiej Bahdašoŭ, asudžany letaś za kradziažy i dziorzkija ŭcioki ź izalatara, daŭ intervju telekanału ANT. Hutaryŭ jon z presaj u SIZA, dzie čakaje novaha sudovaha pracesu. Bahdašova buduć sudzić za zabojstva i razbojny napad na zapraŭku, paviedamlaje Tut.by.
Siarhiej Bahdašoŭ. Skrynšot videa ANT.
Siarhiej Bahdašoŭ doŭhi čas zarablaŭ kradziažami, adnačasna źbirajučy vialiki arsienał zbroi — abrez, para pistaletaŭ, aŭtamat Kałašnikava, detanatary. Časam jon puskaŭ zbroju ŭ spravu. 8 červienia 2007 hoda jon abrabavaŭ zapraŭku va Uździenskim rajonie. Pavodle jaho słoŭ, supracoŭnica zapraŭki ŭčapiłasia ŭ jaho, i dla taho, kab žančyna jaho adpuściła, jon udaryŭ jaje ručkaj pistaleta pa hałavie. U hetym złačynstvie Bahdašoŭ pryznaŭsia tolki sioleta.
Zbroju Bahdašoŭ zaŭsiody kuplaŭ u adnaho i taho ž čałavieka, aŭtaryteta z hrupy «Pasiałkovych». U 2007 hodzie ŭ niejki momant jamu zdalisia padazronymi pytańni pradaŭca. Bahdašoŭ vyrašyŭ vyvieźci aŭtaryteta ŭ zacišnaje miesca i dapytać z katavańniem, ale dopyt skončyŭsia śmierciu pradaŭca zbroi.
— Ja jaho z mašyny vyvałak, udaryŭ, i jon upaŭ, potym nahoj jašče jaho ŭdaryŭ. Zatresła jaho, jon zadychaŭ hłyboka, a potym straciŭ prytomnaść. Potym u jaho spyniłasia dychańnie, i ja zrazumieŭ, što ŭsio na hetym, — pryznaŭsia Bahdašoŭ žurnalistam.
Hetaje zabojstva zaraz rasśledujecca, Bahdašova čakaje novy sud. Pryznacca ŭ zroblenym, pavodle jaho słoŭ, mužčynu prymusiła viera ŭ Boha.
40-hadovy ŭradženiec Mahiloŭskaj vobłaści Siarhiej Bahdašoŭ 29 maja 2009 hoda, znachodziačysia ŭ kamiery izalatara časovaha ŭtrymańnia ŭ budynku suda Žodzina, kudy byŭ dastaŭleny ŭ jakaści abvinavačanaha na sudovaje pasiedžańnie pa kryminalnaj spravie, źbiŭ načalnika izalatara, zavałodaŭ tabielnaj zbrojaj i ŭciok z-pad varty. Za pabieh asudzili načalnika izalatara, jaki kanvajavaŭ Bahdašova — jamu dali čatyry hady «chimii».
U Smalavickim rajonie Bahdašoŭ skraŭ Cadillac, na jakim źjechaŭ u Rasiju. Da hetaha jon zarablaŭ kradziažami juvielirnych vyrabaŭ, aparatury i instrumienta z katedžaŭ, a taksama kradziežam darahich mašyn, za što i byŭ asudžany.
Złodziej paśpiachova «hastralavaŭ» pa Minskaj i Viciebskaj abłaściach, ale, niahledziačy na patałahičnaje šancavańnie i aściarožnaść (pracavaŭ u palčatkach, abutak paśla kožnaha kradziažu mianiaŭ), koła vakoł jaho ściskałasia. Za niekalki miesiacaŭ da zatrymańnia Bahdašoŭ byŭ zafiksavany kamieraj źniešniaha nazirańnia va Uździe, kali zdymaŭ z bankamata hrošy pa vykradzienaj kartcy.
Jaho zatrymali ŭ vieraśni 2008 hoda, na toj momant Bahdašoŭ padazravaŭsia bolš čym u dziesiaci kradziažach. Paśla akazałasia, što ich, tolki dakazanych śledstvam, kala paŭsotni. Pryčynienaja škoda za niapoŭnyja try hady (2006-2008) skłała amal miljon rubloŭ.
Paśla ŭciokaŭ z žodzinskaha suda Bahdašoŭ pačaŭ «hastralavać» pa Pskoŭskaj vobłaści, dzie abkradaŭ elitnyja damy. Zatrymali Bahdašova, abvieščanaha ŭ mižnarodny vyšuk pa linii Interpoła, tolki ŭ lipieni 2014 hoda ŭ Padmaskoŭi. U hetym pravaachoŭnym orhanam dapamoh zvyčajny płot, za jaki začapiŭsia złačyniec. Raźviłasia hanhrena, i nahu pryjšłosia amputavać.
Adsutnaść nahi nie pieraškodziła jamu sprabavać jašče raz źbiehčy z-pad varty. U 2015 hodzie jon napaŭ na kanvairaŭ ŭ budynku Pskoŭskaha suda. Bahdašoŭ, jaki ruchaŭsia jašče na mylicach, šturchnuŭ supracoŭnika palicyi, a zatym udaryŭ u tvar druhoha kanvaira. U jakaści zbroi invalid vykarystaŭ ručku sa stryžniem macavańnia, jakuju jon adkruciŭ ad mylicy. Praŭda, sam jon svaju vinu ŭ napadzie na kanvoj admaŭlaŭ. Pavodle jaho słoŭ, ručka mylicy sama vyskačyła, mylica ŭpała, jon straciŭ raŭnavahu, adskočyŭ ubok supracoŭnika kanvoju i schapiŭsia za jaho, kab nie ŭpaści, a palicejski, maŭlaŭ, sam paraniŭsia ab kajdanki.
U Rasii jaho prysudzili da 13 hadoŭ pazbaŭleńnia voli, paśla čaho pieradali ŭ Biełaruś, dzie jaho čakaŭ sud za kradziažy i ŭcioki z-pad varty. U 2018 hodzie jaho prysudzili da 14 hadoŭ pazbaŭleńnia voli.
