Jak rastłumačyŭ kiraŭnik tvorčaj majsterni «TM-7» Anatol Cejtlin, pry budaŭnictvie faktyčna stvarajecca adziny kompleks akademii tenisa, dla čaho isnujučuju spartyŭnuju bazu treba dapoŭnić nieabchodnymi elemientami: basiejnam, miedyka-adnaŭlenčym centram, abjektam hramadskaha charčavańnia i žyłymi numarami dla raśsialeńnia spartsmienaŭ, jakija pryjazdžajuć hulać u vialiki tenis, dla dziaciej, jakija tut buduć treniravacca. Pa takim ža pryncypie ŭ Minsku, taksama na pr. Pieramožcaŭ, była stvorana akademija futboła. Usio pieraličanaje zadumana raźmiaścić u novym budynku. Miarkujecca, što zabudoŭščyk uźviadzie i pieradaść abjekt u biazvypłatnaje karystańnie fiederacyi tenisa. Dla inviestycyjnaj akupnaści prajekta ŭ budynku praduhledžany dadatkovyja pamiaškańni dla zdačy ŭ arendu, ale havorka nie idzie ab handli.
Što tyčycca źniešniaha abličča i paramietraŭ kompleksu, to architektary pieršapačatkova pastavili sabie peŭnyja abmiežavańni: budynak nie pavinna być vyšej raźmieščanaha pobač handlovaha centra, škło na fasadzie maksimalna prybrali, kab nie tyražavać vobraz abrydłych biznes-centraŭ. Pakolki daŭžynia budynka — 110 m, pastaralisia zrabić fasad niemanatonnym, umoŭna padzialiŭšy budynak pa vyšyni na try častki, kožnaja ź jakich adroźnivajecca. Taki pryjom vizualnaha dzialeńnia fasadaŭ pa viertykali charakterny dla zabudovy pr. Niezaležnaści ŭ jaho asnoŭnaj častki.
Raźmiaščajučy abjekt na davoli vuzkim ziamielnym učastku, prajekciroŭščyki pradumali, jak maksimalna zachavać bujnyja zialonyja nasadžeńni pa susiedstvie ź miescam zabudovy.
