Ranicaj 16 vieraśnia palicyja Maryupala znajšła zastrelenym u padjeździe adnaho z žyłych damoŭ bajevika «DNR» Ramana Džumajeva, jakoha niadaŭna vypuścili z ukrainskaj turmy pad chatni aryšt, paviedamlaje Biełsat.
Pra heta paviedamlaje kijeŭskaje vydańnie lb.ua sa spasyłkaj na krynicy ŭ pravaachoŭnych orhanach. Na dadzieny momant palicyja vyśviatlaje abstaviny zdareńnia.
5 žniŭnia sud Kastryčnickaha rajona Maryupala pastanaviŭ adpuścić pad chatni aryšt Ramana Džumajeva razam ź jašče adnym bajevikom — abodvuch vinavacili va ŭdziele ŭ terarystyčnaj hrupoŭcy i niezakonnym uzbrojenym farmavańni, hvałcie ŭ dačynieńni da pracaŭnika pravaachoŭnych orhanaŭ (art. 258-3, 260 i 345 KK Ukrainy). Maksimalnaje pakarańnie dla ŭdzielnika niezakonnaha ŭzbrojenaha farmavańnia mahło skłaści da 15 hadoŭ turmy.
Džumajeŭ — ukrainiec, naradziŭsia ŭ 1991 hodzie ŭ Maryupali. Letam 2014 hodu pajšoŭ vajavać na bok «DNR» u składzie interbryhady «Piatnaška». Jon prajšoŭ bai pad Debalcava i ŭ rajonie Danieckaha aeraportu. Letam 2015 hodu bajavik pakinuŭ Danbas i pierajechaŭ žyć da svajakoŭ u Biełaruś. Amal hod jon prapracavaŭ mieniedžaram pa prodažach u Marjinaj Horcy pad Mienskam.
Nijakaj uvahi biełaruskich pravaachoŭnych orhanaŭ Džumajeŭ na sabie nie adčuvaŭ. Pra heta jon raspaviadaŭ u intervju Radyjo Svaboda ŭ sakaviku 2016-ha.
«Našych tut šmat», — śćviardžaŭ bajavik u adkaz na pytańnie žurnalista, ci nie baicca jon ekstradycyi va Ukrainu, bo na toj momant jak minimum adna kryminalnaja sprava ŭ dačynieńni da jaho tam užo była raspačataja.
Adnak Džumajeŭ zdoleŭ viarnucca ŭ Maryupal samastojna. Ź vieraśnia 2017 pa travień 2018 jon znachodziŭsia pad vartaj, ale potym jaho vypuścili pad chatni aryšt. Za niekalki miesiacaŭ na voli toj navat paśpieŭ adkryć ułasny biźnies: biez dazvołu ŭładaŭ pastaviŭ na vulicy kijosk. Kali ŭ 2018 hodzie kijosk demantavała palicyja, Džumajeŭ pyrsnuŭ hazavym bałončykam i napaŭ na palicyjanta, a taksama na vieterana ATA, za što byŭ znoŭ zatrymany.
Sioleta ŭ žniŭnia jaho ŭ čarhovy raz adpuścili ź SIZA pad chatni aryšt, paviedamlaŭ maryupalski aktyvist Alaksiej Lepirydzi sa spasyłkaj na Adziny rejestr sudovych rašeńniaŭ Ukrainy.
