Užo praz dva miesiacy buduć zaćvierdžanyja imiony novych deputataŭ Pałaty pradstaŭnikoŭ. Tym časam idzie praces vyłučeńnia kandydataŭ.
Staršynia CVK Lidzija Jarmošyna. Fota Nadziei Bužan.
Nahadajem, što kandydaty ŭ deputaty vyłučajucca tryma šlachami.
Spačatku ŭ hulniu ŭstupajuć tyja, chto vyrašaje źbirać podpisy žycharoŭ rajona. Paśla da ich dadajucca tyja, chto vyłučajecca ad «pracoŭnych kalektyvaŭ», a taksama pradstaŭniki palityčnych partyj, zaćvierdžanyja na źjeździe.
Pradstaŭniki «śpisa ŭłady» zvyčajna abirajuć ažno dva, a to i try šlachi adnačasova. Dla ich važna prademanstravać narodnuju padtrymku, tamu jany amal zaŭždy źbirajuć podpisy.
Ad Minska budzie abrana 20 deputataŭ. Praŭda, u niekatorych akruhach śpisy pretendentaŭ jašče nie zaćvierdžanyja.
Šabanoŭskaja akruha №91
Tut pakul što, badaj, samy niepradstaŭničy skład kandydataŭ. Sprabuje prabicca ŭ parłamient dyrektarka Biełaruskaha handlova-ekanamičnaha ŭniviersiteta spažyvieckaj kaapieracyi Halina Łahunova. Siarod supiernikaŭ — dyrektarka škoły ad praŭładnych kamunistaŭ i małady dyrektar pryvatnaj kampanii.
Aŭtazavodskaja akruha №92
Favaryt — namieśnik hienieralnaha dyrektara MAZ Alaksandr Hrankoŭski. Jašče źbirajuć podpisy dyrektarka kulinarnaha kaledža i načalnik administratyŭnaha kompleksa Hałoŭnaha haspadarčaha ŭpraŭleńnia Kiraŭnictva spravami prezidenta.
Vaśniacoŭskaja akruha №93
Tut pakul źbirajuć podpisy tolki dva čałavieki — namieśnica hałoŭnaha doktara 5-j balnicy Maryna Škrob i namieśnica dyrektara Upraŭleńnia miechanizacyi №79.
Śvisłackaja akruha №94
Pieraabirajecca były pasoł u Aŭstryi Valer Varaniecki. Zmahajecca ź im dyrektarka škoły.
Kupałaŭskaja akruha №95
Taćciana Sajhanava papiaredni raz abirałasia ad Biełaruskaj patryjatyčnaj partyi kazaka Ułachoviča, pracavała tady namieśnicaj dyrektara «Kamunarki». Jana znoŭ idzie na vybary. Supiernik ad Partyi BNF — Ryhor Kastusioŭ.
Hrušaŭskaja akruha №98
Tut pieraabirajecca deputatka Ludmiła Makaryna-Kibak, kolišniaja dyrektarka RNPC otarynałarynhałohii.
Paŭdniova-Zachodniaja akruha №99
Taksama anijakaj intryhi — pieraabirajecca deputat Ihar Kamaroŭski. Jon byŭ namieśnikam dyrektara Minskaha vahonaramontnaha zavoda. Prachodzić pa kvocie Respublikanskaj partyi pracy i spraviadlivaści.
Jasieninskaja akruha №100
I ŭ treciaj akruzie ŭ Maskoŭskim rajonie Minska deputat, jak čakajecca, zastaniecca tym samym. Aksana Hajduk raniej pracavała pieršaj namieśnicaj minskaha «Harremaŭtadara».
Staravilenskaja akruha №105
Tut bałatujecca sudździa Viarchoŭnaha suda Śviatłana Lubieckaja. Samy pradstaŭničy kandydat ad apazicyi — vykanaŭca abaviazkaŭ staršyni AHP Mikałaj Kazłoŭ.
Kołasaŭskaja akruha №106
Kandydatam ad ułady vyhladaje pieršy prarektar BDUIR Siarhiej Dzik. Jaho supierniki — dyrektarka kaledža dekaratyŭna-prykładnoha mastactva, a taksama piensijanier z prafsajuza pčalaroŭ i dva biespracoŭnyja apazicyjaniery, Aleś Krutkin i prychilnik Statkieviča Siarhiej Sparyša (akazvajecca, jaho proźvišča pišacca mienavita tak).
Uschodniaja akruha №107
Staršynia «Biełaj Rusi» Hienadź Davydźka nie moh apynucca tut prosta tak. Kankurent ad apazicyi — lidar «Ruchu za Svabodu» Juraś Hubarevič, jakoha šmat chto bačyć budučym kandydatam ad apazicyi na prezidenckich vybarach. Jašče jość mašynist i dyrektarka škoły.
Kalinoŭskaja akruha №108
Tut samy śpiecyfičny nabor kandydataŭ. U pryvatnaści, jość lidar ŁDPB Aleh Hajdukievič. Jaho ledź nie puścili ŭ papiaredni skład parłamienta — nivodzin z kandydataŭ ad ułady navat nie źbiraŭ podpisy pa jaho akruzie. Ale ŭ apošni momant z Aŭstryi prylacieŭ były pasoł Valer Varaniecki, jakoha ŭ vyniku i prapuścili ŭ Pałatu pradstaŭnikoŭ.
Ciapierašnija kankurenty Hajdukieviča — dyrektar Remaŭtadara Pieršamajskaha rajona i staršynia dabračynnaj arhanizacyi «Kłub lvoŭ». A taksama aktyvist «Jeŭrapiejskaj Biełarusi», abaronca Kurapataŭ Leanid Kułakoŭ.
Uručskaja akruha №109
Pakul što deputat ad hetaj akruhi — vajskoviec Siarhiej Bobrykaŭ. Pierad vybarami jon kiravaŭ Vajskovaj akademijaj, uznačalvaŭ Biełaruski sajuz aficeraŭ. Ciapier u deputaty idzie novy staršynia Sajuza aficeraŭ, Ivan Hardziejčyk.
Pakul u jaho tolki adna supiernica — režysiorka Volha Mikałajčyk.
Partyzanskaja akruha №110
Vyznačać budučaha pieramožcu na biełaruskich vybarach nieskładana. Vyklučeńni časam zdarajucca, kali vyrašajuć bałatavacca sielebryci.
Naprykład, na vybary vyrašyŭ pajści televiadučy ANT Tenhiz Dumbadze (darečy, jon uradženiec Biełarusi). Aproč taho, podpisy źbirajuć rektar Minskaha kaledža pradprymalnictva Viktar Małatoŭnik i kamunist Valeryj Uchnaloŭ. Jość navat staršynia Lihi kamunistyčnaj moładzi Biełarusi. Siarod apazicyjanieraŭ — papularnaja žurnalistka Iryna Chalip i Viktar Jančurevič z «Ruchu za Svabodu».
Čytajcie artykuły za 2016 hod:
110 kandydataŭ, jakija buduć «abranyja» ŭ parłamient — praviercie śpis paśla vybaraŭ
96%: «Naša Niva» adhadała pieramožcaŭ vybaraŭ na 106 akruhach
