Niekalki dzion tamu byłoha hałoŭnaha architektara Minska Paŭła Łučynoviča dastavili ź SIZA ŭ lakarniu z paralušam nižniaj častki cieła, paviedamlaje TUT.BY sa spasyłkaj na infarmavanyja krynicy. Surazmoŭcy partała taksama raspaviali, što paśla narady Łukašenki ź siłavikami na spravu Łučynoviča źviarnuli dadatkovuju ŭvahu.
Fota: Dźmitryj Bruško, TUT.BY
Paŭła Łučynoviča zatrymali 16 sakavika 2019 hoda pa padazreńni ŭ atrymańni chabaru ŭ čatyry tysiačy dalaraŭ ad pradprymalnika. Na apieratyŭnym videa fihuravali hrošy, jakija znachodzilisia ŭ aŭtamabili. Z taho momantu Pavieł Łučynovič znachodziŭsia ŭ SIZA.
— A ŭ paniadziełak jaho adtul zabrali ŭ špital — paralizavała nižniuju častku cieła, — kaža krynica.
Druhi surazmoŭca partała raspaviadaje, što Łučynovič znachodzicca ŭ adździaleńni nieŭrałohii piataj HKB, dzie jaho ŭčora praapieravali. Dyjahnazy źviazany ź infiekcyjaj. Śpiecyjalisty kažuć, što heta moža być vyklikana jak schilnaściu arhanizma (plus umovy ŭtrymańnia ŭ SIZA), tak i ŭdaram. Krynicy adznačajuć, što heta moža sapraŭdy pryvodzić da paralušu, ale paśla kursu lačeńnia cieła moža adnaŭlacca całkam.
Jak raspaviadaje krynica, znajomaja z chodam kryminalnaj spravy, Łučynoviča abvinavačvajuć u atrymańni chabaraŭ pa dvuch epizodach. Pieršy — u momant zatrymańnia.
— Ale, nakolki ja čuŭ, pa hrošach, jakija znachodzilisia ŭ jahonaj mašynie ŭ toj momant, było praviedziena niekalki ekśpiertyz. I ni adna ź ich nie pakazała, što jon da hetych kupiuraŭ dakranaŭsia, — kaža surazmoŭca.
Druhi epizod, pavodle jaho słoŭ, — atrymańnie Łučynovičam u svaim kabiniecie butelki šampanskaha i prysmakaŭ napiaredadni Novaha hoda ad pradstaŭnika kamiercyjnaj kampanii.
