Urad Brytanii źvierniecca da karalevy z prośbaj prypynić pracu parłamienta litaralna praź niekalki dzion paśla taho, jak deputaty viernucca z kanikuł, i za niekalki tydniaŭ da vychadu krainy ź Jeŭrasajuza, piša Bi-bi-si.
Heta značyć, što kabinietu premjera Borysa Džonsana ŭdasca pieranieści pramovu karalevy, u jakoj vykładajucca płany ŭrada, na 14 kastryčnika, paviedamlaje palityčny ahladalnik Bi-bi-si Łora Kiunśbierh.
Heta taksama aznačaje, što ŭ členaŭ parłamienta nie zastaniecca času na pryniaćcie jakich-niebudź zakonaŭ, jakija mahli b pieraškodzić premjer-ministru vyvieści Brytaniju ź Jeŭrasajuza biez pahadnieńnia 31 kastryčnika.
Pavodle jaje słoŭ, taki krok moža vyklikać surjozny palityčny kryzis, bo, jak ličać deputaty, heta pazbavić ich mahčymaści paŭnavartasna ŭdzielničać u pracesie «breksitu».
Borys Džonsan zajaŭlaŭ, što chacieŭ by, kab Brytanija vyjšła ź ES z pahadnieńniem, ale kali damovy nie budzie, kraina ŭsio roŭna pakinie Jeŭrasajuz 31 kastryčnika.
Hetaja pazicyja zaachvociła šerah apazicyjnych deputataŭ abjadnacca, kab pasprabavać zabłakavać mahčymy «žorstki breksit», vykarystoŭvajučy dla hetaha parłamiencki praces.
Ale kali praca parłamienta budzie prypynienaja, jak heta prapanujecca, 10 vieraśnia, u parłamientaryjaŭ budzie ŭsiaho niekalki dzion na nastupnym tydni, kab damahčysia źmien.
Namieśnik lidara lejbarystaŭ Tom Uotsan napisaŭ u tvitary, što heta «absalutna skandalnaja abraza našaj demakratyi»
