Namieśnik staršyni Partyi BNF Alaksandr Stralcoŭ syšoŭ z partyi. Taki jahony ŭčynak staŭ adkazam na toje, što staršynia partyi Ryhor Kastusioŭ naviedaŭ hiej-parad ŭ Vilni.
«Ja syšoŭ tamu, što liču, što ŭdzieł staršyni Partyi BNF, niezaležna ad taho, byŭ jon zmušany abo dobraachvotny, u hetaj padziei dla mianie, jak člena partyi, niedapuščalny. Partyja ŭsio-taki maje kansiervatyŭnaje abličča. I jość supiarečnaść pamiž kansiervatyŭnym abliččam i takimi dziejańniami», — raspavioŭ palityk u kamientary belsat.eu.
Surazmoŭca taksama adznačyŭ, što nie pytaŭsia, ci niechta jašče z hetaj pryčyny choča pakinuć Partyju BNF, bo «kožny adkazvaje sam za siabie».
Alaksandr Stralcoŭ paviedamiŭ, što asobnaj palityčnaj siły stvarać nie źbirajecca.
Fotazdymak Ryhora Kastusiova na fonie viasiołkavych ściažkoŭ padčas Bałtyjskaha hiej-prajdu 8 červienia apublikavała ŭ fejsbuku aktyvistka ekałahičnaha ruchu Taćciana Novikava.
U intervju «Našaj Nivie» staršynia PBNF pryznaŭ, što naviedaŭ šeście, kab «sfarmavać svoj asabisty padychod» na hetuju temu.
«Mnie, jak biełaruskamu palityku, cikava było pahladzieć, što heta za mierapryjemstva, što heta za ludzi, jak jany vyhladajuć, što chočuć skazać hetym mierapryjemstvam. I pabyŭšy tam, ja pačaŭ lepš razumieć hetych ludziej. Majo staŭleńnie da ich stała mienš kateharyčnym», — raspavioŭ jon i dadaŭ, što «ničoha strašnaha» u hiej-prajdzie niama.
Čytajcie:
Lidar BNF Ryhor Kastusioŭ schadziŭ u Vilni na hiej-parad
Na jaho dumku, takaja akcyja moža taksama pravodzicca ŭ Minsku, bo zjaŭlajecca pravam hramadzianaŭ, a «ułady pavinny paspryjać praviadzieńniu takoha mierapryjemstva, kali jano nie budzie parušać zakanadaŭstva».
Sojm PBNF razhledzić apošnija padziei
U kamientary «Biełsatu» Ryhor Kastusioŭ adznačyŭ, što ŭ partyi vyrašyli nie kamientavać sychod Alaksandra Stralcova, pakul apošnija padziei nie buduć razhledžanyja na partyjnym sojmie. Sojm musić adbycca ŭžo ŭ hetuju subotu, 29 červienia.
U svaju čarhu były staršynia Partyi BNF, a siońnia namieśnik staršyni Alaksiej Janukievič raspavioŭ, što pierad sojmam adbudziecca pasiadžańnie palityčnaj kamisii, na jakim usio aznačanaje budzie abmierkavanaje.
«Mahčyma, my vyniesiem na razhlad sojmu hetuju situacyju, ale kali takoje adbudziecca, to ja budu vystupać za toje, kab heta było ŭ zakrytym farmacie», — zajaviŭ palityk.
Alaksandr Stralcoŭ byŭ siabram BNF z 1990 hoda. Jon naležaŭ da pravakansiervatyŭnaha kryła partyi, vystupaŭ za viartańnie ŭłasnaści dasavieckim uładalnikam i trymaŭsia kancepcyi litvinizmu.
U 1999—2003 jon užo prypyniaŭ svajo siabroŭstva ŭ partyi na znak niazhody z padziełam partyi na KCHP-BNF na čale ź Zianonam Paźniakom i PBNF, jakuju ŭznačaliŭ Vincuk Viačorka. U 2003—2007 Stralcoŭ byŭ namieśnikam staršyni Mižnarodnaj kamisii PBNF, a ŭ 2009—2011 hadach uznačalvaŭ Kamisiju partyjnaha navučańnia. U 2011 hodzie jon byŭ upieršyniu abrany namieśnikam staršyni partyi.
