Parłamient Kyrhyzstana pazbaviŭ niedatykalnaści eks-prezidenta Ałmaźbieka Atambajeva. Ciapier jamu moža pahražać kryminalny pieraśled pa abvinavačvańniach u karupcyi, piša bbc.com.
Tydzień tamu deputaty pieradali ŭ prakuraturu pieralik abvinavačvańniaŭ u adras Atambajeva, častka ź ich Hienprakuratura padtrymała.
U vypadku, kali śledstva dakaža datyčnaść Atambajeva da ahučanych deputatami abvinavačvańniaŭ, a sud pryznaje jaho vinavatym, jamu moža pahražać pažyćciovy termin.
Atambajeŭ uznačalvaŭ Kyrhyzstan ad 2011 da 2017 hoda.
U 2017 hodzie Atambajeŭ padtrymaŭ vyłučeńnie na pasadu prezidenta ciapierašniaha kiraŭnika krainy Saaranbaja Žeenbiekava. Ale ŭžo viasnoj 2018 hoda stała viadoma, što ŭ byłoha i ciapierašniaha prezidentaŭ Kyrhyzstana ŭźnikli surjoznyja roznahałośsi.
Adrazu niekalki ludziej z kamandy Atambajeva znachodziacca pad śledstvam pa kryminalnych spravach.
U mai Žeenbiekaŭ padpisaŭ zakon, jaki dazvalaje pazbaŭlać eks-prezidentaŭ niedatykalnaści. Zhodna z dakumientam, były kiraŭnik dziaržavy moža być u asobnych vypadkach pryciahnuty da kryminalnaj adkaznaści paśla skančeńnia paŭnamoctvaŭ albo ŭ vypadku adchileńnia ad ułady.
Abvinavačvańni suprać Atambajeva vyłučyła śpiecyjalnaja deputackaja kamisija (jak heta i praduhledžvaje novy zakon).
Pa viersii parłamientaryjaŭ, Atambajeŭ datyčny da karupcyi pry madernizacyi CEC Biškieka, niezakonnaj transfarmacyi ziemlaŭ, vyzvaleńni z turmy pa falšyvych miedycynskich daviedkach kryminalnaha aŭtaryteta, uzurpacyi ŭłady i inšych niezakonnych dziejańniaŭ.
Hienprakuratura padtrymała častku abvinavačvańniaŭ, ale nie znajšła paćvierdžańnia, što Atambajeŭ mieŭ dačynieńnie da ŭzurpacyi ŭłady i represij suprać žurnalistaŭ i palityčnych apanientaŭ.
Pasiadžeńnie parłamienta, padčas jakoha vyrašałasia pytańnie ab źniaćci z Atambajeva niedatykalnaści, prajšło biez eks-prezidenta. Jon zajaviŭ, što ŭsie abvinavačvańni źjaŭlajucca «absurdnymi i nieabhruntavanymi» i vyklikanyja «tolki imknieńniem dziejučaha prezidenta likvidavać palityčnaha apanienta».
Kala doma Atambajeva ŭ siale Koj-Taš sabrałasia niekalki sotniaŭ jaho prychilnikaŭ. Jany vystavili bietonnyja błoki na darozie, jakaja viadzie da doma byłoha prezidenta. Atambajeŭ zajaviŭ, što ŭ jaho jość zbroja, i jon «pryvyk abaraniać siabie sam». Daradčyca paźniej udakładniła, što havorka išła pra ŭznaharodnuju zbroju.
Atambajeŭ - pieršy prezident Kyrhyzstana, jaki dobraachvotna raźvitaŭsia z uładaj paśla pieršaha terminu. Jaho papiaredniki - Askar Akajeŭ i Kurmanbiek Bakijeŭ - byli zrynutyja ŭ vyniku revalucyj. Akramia Atambajeva dobraachvotna sychodziła z pasady tolki Roza Atunbajeva - jana była prezidentam pierachodnaha pieryjadu ŭ 2010-2011 hadach.
Paśla revalucyj 2005 i 2010 hadoŭ prychilniki byłych prezidentaŭ apynalisia na łavie padsudnych. Heta było vytłumačalna, pakolki Akajeŭ i Bakijeŭ sprabavali zdušyć akcyi pratestu siłaj. Pieradača ŭłady ad Atambajeva da ciapierašniaha prezidenta krainy prajšła mirna, ale były kiraŭnik dziaržavy i jaho prychilniki nie zmahli paźbiehnuć abvinavačvańniaŭ ŭ złoŭžyvańni paŭnamoctvami.
