Supracoŭniki adździełu pa baraćbie z ekanamičnaj złačynnaściu zatrymali dyrektara selekcyjna-hibrydnaha centru «Zarečča» (Rahačoŭski rajon), paviedamili Svabodzie infarmavanyja krynicy.
Učora na partale Tut.by źjaviłasia infarmacyja, što ŭ haspadarcy praź niedachop karmoŭ za travień zdochli kala 2 tysiač śviniej.
Telefon kiraŭnika haspadarki Viktara Mamuryna ciapier niedasiažny. U administracyi sielekcyjna-hibrydnaha centru «Zarečča» adkazvajuć, što «pakul kiraŭnika niama».
«Mnie pakul ničoha nieviadoma. Supracoŭniki UBEZ ničoha nie paviedamlali. Kali infarmacyja paćvierdzicca, jana budzie raźmieščanaja na sajcie UUS», — adkazaŭ Svabodzie vykanaŭca abaviazkaŭ kiraŭnika presavaj słužby UUS Jury Pilkievič.
U publikacyi Tut.by havorycca, što letaś praz zasuchu vydaŭsia nieŭradžaj zbožža. Finansavych srodkaŭ haspadarki nie chapiła, kab nabyć karmy dla 60-tysiačnaha pahałoŭja śviniej.
«U krasaviku i traŭni karmoŭ nia stała. Haładoŭka kančatkova dabiła śviniej», — skardzilisia rabotniki śvinafermy.
Na miasakambinaty śviniej nie prymali, bo jany mieli małuju vahu. Na videa vidać, jak źniasilenyja śvińni viščać, chistajucca, padajuć i dochnuć.
Dyrektar pradpryjemstva Viktar Mamuryn tłumačyŭ, što atrymałasia «zamknutaje koła».
«Zbožža nie było, śvińni niedakormlenyja, niama prybytku, niama vyručki — i niama hrošaj na korm», — tłumačyŭ Tut.by dyrektar.