Na 72-m Kanskim kinafestyvali abviaścili pieramožcaŭ druhoha pavodle značnaści konkursu aficyjnaj prahramy «Asablivy pohlad», piša radyjo «Svaboda».
Hałoŭny pryz «Asablivaha pohladu» atrymała brazylskaja meladrama «Niabačnaje žyćcio Eŭrydyki Hušmau» Karyma Ajnuza. Heta ekranizacyja adnajmiennaha ramanu 2015 hodu Marty Batalji ab dźviuch razłučanych siostrach u Rya-de-Žanejra, dziejańnie razhortvajecca ŭ 1950-ch hadach.
Druhi pavodle značnaści «Pryz žury» dastaŭsia filmu «Ahoń pryjdzie» Olivera Łaše. Heta pieršaja karcina, źniataja na halisijskaja movie. Hałoŭny hieroj, jaki atrymaŭ turemny termin za padpały, viartajecca ŭ rodnuju viosku ŭ Halisii. Nieŭzabavie pačynajecca novy pažar. Film źniaty na styku hulniavoha kino i dakumentalnaha — u samych uražlivych scenach źniatyja sapraŭdnyja lasnyja pažary.
Treciuju ŭznaharodu — za lepšuju režysuru — atrymaŭ rasijanin Kantemir Bałahaŭ, vypusknik režyserskaj majsterni Alaksandra Sakurava ŭ Kabardzina-Bałkarskim dziaržaŭnym universytecie za film pra kachańnie ŭ paślablakadnym Leninhradzie «Dyłda». Dziejańnie pačynajecca ŭ 1945 hodzie. Ija, jakaja viarnułasia z frontu (Viktoryja Mirašničenka), vysokaja dziaŭčyna, «dyłda», ciarpić ad kantuzii, pracuje ŭ špitali i dahladaje dzicia pakinutaj na froncie siabroŭki Mašy (Vasilisa Pierałyhina). «Dyłda» była natchnionaja pieršaj knihaj biełaruskaj piśmieńnicy laŭreata Nobeleŭskaj premii Śviatłany Aleksijevič «U vajny nie žanočaje abličča». Scenar 27-hadovy Bałahaŭ napisaŭ sumiesna ź piśmieńnikam Alaksandram Cierachavym («Kamienny most»).
Usiaho dla konkursu «Asablivy pohlad» było adabrana 18 karcin. Žury «Asablivaha pohladu» uznačalvała režysior ź Libanu Nadzin Łabaki. Razam ź joj prahramu sudzili režysery Łukas Dont i Lisandra Alonsa, a taksama aktorka Maryna Fua i pradusar Narchan Šekierdžy-Porst.
