Zavodskim (h. Minska) rajadździełam SK zavieršana rasśledavańnie kryminalnaj spravy ŭ adnosinach da zamiežnaha studenta druhoha kursa Biełaruskaj dziaržaŭnaj avijacyjnaj akademii, što adbyłosia ŭ listapadzie.
Śledčymi razam z supracoŭnikami milicyi ŭstanoŭleny abstaviny zdareńnia. 18-hadovy student i 21-hadovy minčuk damovilisia sustrecca a 18 hadzinie la navučalnaj ustanovy na Ubareviča dla vyśviatleńnia adnosin.
Sustreŭšysia maładyja ludzi pačali razmaŭlać, a siabry, što pryjšli razam ź imi, stajali ŭ baku. Praź niekatory čas student, znachodziačysia ŭ stanie ałkaholnaha apjanieńnia, udaryŭ nažom minčuka, paśla čaho pamiž imi zaviazałasia bojka, da jakoj dałučylisia niekalki maładych ludziej.
Kanflikt doŭžyŭsia nie bolš za tryccać siekund, paśla čaho studenty-zamiežniki ŭciakli ź miesca zdareńnia, pakinuŭšy chłopca lažać na ziamli. Siabry advieźli paranienaha ŭ balnicu, dzie toj pamior.
U toj ža viečar supracoŭnikami milicyi padazravany byŭ zatrymany.
Pavodle zaklučeńnia ekśpierta śmierć minčuka nastupiła ad nažavoha ranieńnia ŭ vobłaść žyvata, u vyniku była paškodžana aorta.
U zahinułaha taksama byli vyjaŭlenyja cialesnyja paškodžańni ŭ vobłaści tvaru i abiedźviuch kiściaŭ, jakija adnak nie paciahnuli za saboj karotkačasovaha rasstrojstva zdaroŭja abo niaznačnaj straty pracazdolnasci, i nie źviazanyja sa śmierciu.
Śledčymi dapytanyja bolš za 50 śviedak, znajomyja abvinavačanaha i zahinułaha, praviedziena pravierka pakazańniaŭ, praviedziena bolš za dziesiać vočnych stavak.
Vyvučana i dałučany pierapiska ŭ sacyjalnych sietkach pamiž abvinavačanym i zahinułym, jakaja śviedčyć ab praciahłym kanflikcie pamiž imi na hlebie asabistych niepryjaznych adnosin.
Dziejańni abvinavačanaha kvalifikavany pa č. 1 art. 139 (zabojstva). U chodzie rasśledavańnia ad dačy pakazańniaŭ jon admoviŭsia, vinu nie pryznaŭ. Jon źmieščany pad vartu.
Kryminalnaja sprava pieradadziena dla nakiravańnia ŭ sud.
U dačynieńni da studentaŭ-zamiežnikaŭ vyniesiena pastanova ab admovie ŭ zaviadzieńni kryminalnaj spravy ŭ suviazi z adsutnaściu ŭ ich dziejańniach składu złačynstva.
