Na fota: abvinavačvany (sprava).
23 maja Minski haradski sud vynies pryhavor pa spravie 45-hadovaha minčuka Źmitra K. Mužčynu abvinavacili pa častcy 1 artykuła 130 Kryminalnaha kodeksa za raspalvańnie nacyjanalnaj varožaści. Nahodaj dla abvinavačańnia staŭ kamientaryj na adras rasiejcaŭ z vykarystańniem abraźlivych mianušak.
Minčuk atrymaŭ try hady abmiežavańnia voli z nakiravańniem va ŭstanovu adkrytaha typu — na tak zvanuju «chimiju», piša Jeŭraradyjo.
U Źmitra — ciažarnaja žonka i nievialiki ŭłasny biźnies.
Źmicier vystupaje suprać dziejańniaŭ Rasii va Ukrainie i «impierskaści». Na jaho staroncy ŭ Instagram — fota z «Pahoniaj», jon nazyvaje siabie patryjotam Biełarusi. Taksama tam jość zdymki sa ściaham ukrainskaha «Pravaha siektara».
Na zdymku, kamientar da jakoha staŭ abjektam sudovaha raźbiralnictva, vienhierskija vajskoŭcy pieradajuć zbroju ŭkrainskim sałdatam. Źmicier źmiaściŭ jaho na svajoj staroncy ŭ kastryčniku 2017 hoda, a ŭ kamientary da vyjavy napisaŭ pra svajo staŭleńnie: voś, maŭlaŭ, «vydatnaja kasiłka» suprać m… i s…
Praź niekalki miesiacaŭ mužčynu patelefanavali sa Śledčaha kamiteta. Suprać jaho była zaviedzienaja kryminalnaja sprava za raspalvańnie nianaviści. Rasśledavańnie i sud ahułam ciahnulisia 10 miesiacaŭ.
«U spravie jość 80 staronak linhvistyčnaj ekśpiertyzy. Tam niekalki prafiesaraŭ razvažajuć pra toje, chto taki maskal. Tvory Tarasa Šaŭčenki razhladajuć. I prychodziać da vysnovy, što fraza «Kožny maskal pavinien być źniščany» źjaŭlajecca abahulnialnaj — abahulniaje ŭsiu nacyju ŭ cełym. Heta značyć, ja zaklikaju da nacyjanalnaj varožaści, — raspaviadaje Jeŭraradyjo Źmicier K. — Heta doŭžyłasia 10 miesiacaŭ — ja da ich chadziŭ jak na pracu. Piać psichijatraŭ zrabili maju psichijatryčnuju ekśpiertyzu: jaki ŭ mianie nastroj, čamu ja siabie tak pavodžu, jak ja mahu tak abahulniać».
Źmicier raskazvaje, što raniej dapamahaŭ milicyi vyličvać biełaruskich najmitaŭ, jakija ŭdzielničali ŭ bajavych dziejańniach na baku samaabvieščanych «DNR» i «ŁNR», a ciapier sam staŭ abjektam śledstva.
Prysud pakul nie nabyŭ moc, Źmicier K. źbirajecca jaho abskardžvać.
