Kiraŭnik katedry vysokamabilnych desantnych vojskaŭ i siłaŭ specyjalnych aperacyj Nacyjanalnaha ŭniversytetu abarony Ŭkrainy pakarany štrafam za parušeńnie zakanadaŭstva ŭ sfery achovy dziaržaŭnaj tajny, pieradaje Radyjo svaboda.
Adpaviednaje rašeńnie ŭchvaliŭ Sałomianski rajonny sud Kijeva pa vynikach razhladu spravy, adkrytaj Hałoŭnym upraŭleńniem vajskovaj kontravyviedki Słužby biaśpieki Ŭkrainy pa fakcie niesankcyjanavanaha naviedvańnia vajskoŭcam Biełarusi.
U sudovym rašeńni proźvišča vajskoŭca adsutničaje, ale viadoma, što hetuju katedru ŭ Nacyjanalnym universytecie abarony ŭznačalvaje pałkoŭnik Ihar Daniluk.
Jon maje dostup da infarmacyi z hryfami «sakretna» i «zusim sakretna», tamu musiŭ paviedamić svajmu kiraŭnictvu pra plany pajezdki za miežy Ŭkrainy, ale hetaha nie zrabiŭ.
Pavodle infarmacyi SBU, jon pierasiakaŭ miažu 29 krasavika 2017 hodu ŭ punkcie propusku «Vystupovičy». U toj ža čas u sudovym rašeńni nie ŭdakładniajecca meta i čas znachodžańnia ŭkrainskaha vajskoŭca ŭ Biełarusi.
Vajskoviec aštrafavany pavodle minimalnaj škały, praduhledžanaj Kodeksam Ukrainy ab administracyjnych parušeńniach za takija dziejańni — na 510 hryŭniaŭ (pryblizna 20 dalaraŭ u ekvivalencie). Aproč taho, jon musić zapłacić 384 hryŭni sudovaha zboru (15 dalaraŭ).
Zhodna z patrabavańniami, uchvalenymi ŭradam Ukrainy ŭ 2013 hodzie, jon musiŭ pierad pryvatnym vyjezdam za miažu piśmova papiaredzić svajo kiraŭnictva i režymna-sakretny orhan. Apošniamu paśla pajezdki vajskoviec mieŭ paviedamić pra abstaviny, jakija mahli pryvieści da ŭciečki sakretnaj infarmacyi, a taksama pra zacikaŭlenaść takoj infarmacyjaj z boku inšaziemcaŭ.
Analahičnyja patrabavańni va Ŭkrainie isnujuć i da pradstaŭnikoŭ rehijanalnych i miascovych uładaŭ.
U žniŭni 2018-ha dziaržaŭnaja sudovaja administracyja Ŭkrainy svaim zahadam abaviazała ŭsich sudździaŭ zahadzia paviedamlać pra namiery naviedać Biełaruś, a taksama Rasieju, niepryznanyja Prydniastroŭskuju Małdaŭskuju Respubliku, Abchaziju, Paŭdniovuju Asetyju, Krym i akupavanyja častki Danieckaj i Łuhanskaj abłaściej. Pa viartańni jany musiać dać piśmovuju spravazdaču ab vynikach pajezdak.
Sioleta ŭ sakaviku za analahičnuju pajezdku ŭ Biełaruś biez paviedamleńnia kiraŭnictvu byŭ pakarany načalnik aperatyŭna-planavaha adździaleńnia, namieśnik načalnika štabu vajskovaj častki A3628. Jon vyjechaŭ u Biełaruś na słužbovym transparcie 27 kastryčnika 2018 hodu i ŭ toj ža dzień viarnuŭsia va Ŭkrainu.
