8 sakavika ŭ Łuninieckim rajonie skončyłasia trahična. U adnoj ź viosak zdaryłasia biada: 66-hadovy mužčyna ŭ cieščynym domie zabiŭ traich čałaviek, a paśla streliŭ sabie ŭ hałavu, ale zastaŭsia žyvy.
Viadoma, što zdaryłasia ŭsio ŭ vioscy Aziarnica Łuninieckaha rajona.
Čytajcie taksama: Žychar Łuninca rasstralaŭ žonku, ciešču i švahra, a zatym sprabavaŭ zabić siabie
Aficyjnuju viersiju zdareńnia pakul što nie ahučvajuć. Ale miascovyja žychary kažuć, što mužčyna nie byŭ u haściach u cieščy, a pryjechaŭ razabracca z žonkaj.
Zabojcu zavuć Vasil Ž. Jamu 66 hadoŭ. Žyŭ mužčyna ŭ Łunincy, raniej pracavaŭ majstram na zavodzie «Paleśsieelektramaš». Tam ža pracavała i Halina B., žančyna rodam ź vioski Aziarnica.
U Vasila z Halinaj zakruciŭsia raman. Ažanilisia. Dla Vasila heta byŭ druhi šlub.
U pary naradzilisia dvoje synoŭ.
Paźniej, za niekalki hadoŭ da piensii, Vasil zvolniŭsia z zavoda, pačaŭ pracavać zabojščykam skaciny. U 60 hadoŭ vyjšaŭ na piensiju. Žonka taksama źmianiła pracu, była rabočaj na chlebakambinacie.
Vasil z Halinaj žyli narmalna, kažuć ich znajomyja, prablem z ałkaholem mužčyna nie mieŭ. Niaredka pryjazdžali da cieščy ŭ Aziarnicu, vyroščvali sioje-toje na harodzie.
Ale, pa čutkach, apošnim časam žonka pačała zdradžvać Vasilu.
«Kažuć, jana zdradžvała, jon viedaŭ. Ludzi raskazvajuć, što pierad trahiedyjaj jany pasvarylisia, i Halina syšła z adnoj sumačkaj, skazała mužu, što ŭsio jamu pakidaje i sychodzić ad jaho, — kažuć u vioscy. — Žančyna pryjechała ŭ Aziarnicu da maci. U matčynym domie žyŭ i brat Haliny, 50-hadovy Michaił. Jon nidzie nie pracavaŭ, časam vypivaŭ».
Što dakładna zdaryłasia ŭ viaskovym domie — nieviadoma.
Ale miascovyja kažuć, što 8 sakavika Vasil uziaŭ strelbu i pajechaŭ u Aziarnicu. Pryčym mašyny ŭ jaho nie było, to-bok jechaŭ ci to na aŭtobusie, ci to na spadarožnych mašynach.
Pryčym, u toj ža dzień u viosku pryjechaŭ syn Vasila i Haliny razam sa svajoj žonkaj i cieščaj. Ale Vasil u toj čas ci to jašče nie dajechaŭ da Aziarnicy, ci to čakaŭ niedzie, pakul syn i svajaki źjeduć.
Uviečary ŭ domie zastalisia tolki Halina, jaje 50-hadovy brat i ich 78-hadovaja maci, ciešča Vasila. Toj uvajšoŭ u dom.
Kažuć, mužčyna adrazu zastreliŭ svaju žonku Halinu. Ciešča paśpieła schapić telefon i vyklikać milicyju, ale ad chvalavańnia pierabłytała adras, nazvała nie toj numar doma.
Ciešču Vasil zastreliŭ kala telefona.
Michaił, brat žonki, sprabavaŭ źbiehčy, ale na hanku ŭpaŭ — Vasil streliŭ mužčynu ŭ śpinu. Paśla padyšoŭ i streliŭ jašče adzin raz, u hałavu.
Paśla streliŭ u hałavu sabie.
Znajomy Vasila, jaki kaliści pracavaŭ ź im na zavodzie, kaža, što hetaja historyja — poŭnaja niečakanaść. «Nichto nikoli by nie padumaŭ, što Vasil takoje zrobić», — kaža surazmoŭca.
Ciapier Vasil u balnicy pad kanvojem. Jon zastaŭsia žyvy. Na jaho zaviali kryminalnuju spravu, vyśviatlajucca abstaviny zdareńnia.
Adkul u Vasila była niezarehistravanaja zbroja taksama pakul što nieviadoma. Ale ŭ Aziarnicy kažuć, što, nibyta brat Vasila pracuje jehieram, mužčyna moh uziać strelbu ŭ jaho.
