Vilajčanka Tereza P. u pačatku lutaha pryjšła na majstar-kłas pa masažy, a viarnułasia damoŭ z kredytam na čatyry tysiačy čatyrysta rubloŭ. Pry hetym sama nie zrazumieła, jak tak atrymałasia.
A pačałosia ŭsio z taho, što žančynie patelefanavali na damašni telefon. Pryjemny hołas spytaŭ, ci ŭvachodzić jana ŭ katehoryju 37+ i ci maje prablemy z pazvanočnikam. Pačuŭšy stanoŭčyja adkazy, dobrazyčliviec zaprasiŭ žančynu na majstar-kłas pa masažy ŭ vystavačnuju zału imia Silivanoviča, što ŭ Vilejcy. Chutka paśla telefonnaj razmovy žančyna atrymała zaprašeńnie.
— Mama išła na majstar-kłas, a trapiła na rekłamnuju prezientacyju tak zvanych vibranakidak — prystasavańniaŭ, jakija kładucca na kresła i robiać masaž, — raskazvaje Jury, syn Terezy.
U kancy prezientacyi atrymałasia tak, što Tereza P. byccam by vyjhrała padarunki — koŭdru i paduški. Viadučyja žančynu pavinšavali, ździvilisia, jak joj tak pašancavała. A paśla rastłumačyli, što padarunki addaduć tolki pry ŭmovie, što žančyna nabudzie masažnuju nakidku z cudadziejnymi terapieŭtyčnymi jakaściami.
— Maci — žančyna razumnaja. Šmat hadoŭ pracuje ŭ kramie. Ale pačała afarmlać dakumienty. Joj pakazvali, dzie padpisać, i ŭvieś čas pryśpiešvali: maŭlaŭ, užo viečar, nam treba adjazdžać, — raskazvaje Jury.
Akazałasia, što žančyna padpisała kredytnuju damovu na čatyry tysiačy čatyrysta rubloŭ.
Jury nie razumieje, jak heta mahli zrabić. Zarobak ža ŭ maci — trysta rubloŭ. A pra jaho pamier bank navat nie pytaŭsia.
U siamji paličyli, što takija hrošy z zarobkam u trysta rubloŭ maci nie vypłacić. Pačali dumać, jak skasavać damovu. Bolš za toje, praź niekalki dzion paśla vykarystańnia pakupki ŭ žančyny značna pahoršyłasia zdaroŭje. Jana źviarnułasia ŭ palikliniku, što paćviardžaje daviedka. Akazałasia, cudadziejnaja nakidka maje šmat supraćpakazańniaŭ. I Terezie sa svaimi zachvorvańniami takim prystasavańniem karystacca zabaroniena, pra što ŭ daviedcy jość zapis.
Kansultant z «Bazisa pośpiechu»: Treba było lepš dumać pierad pakupkaj
Pra toje, što na praciahu 14 dzion nabyty tavar možna viarnuć, kaža Zakon ab abaronie pravoŭ spažyŭcoŭ ad 20 śniežnia 2001 hoda. Siamja stała telefanavać u firmu «Bazis pośpiechu», jakaja ładziła toj majstar-kłas u Vilejcy. Trubku vielmi doŭha nie zdymali. Kali ž atrymałasia datelefanavacca i raskazać pra biadu, pačuli adkaz:
— Ja tak razumieju, chtości z vašych blizkich nabyŭ nakidku? Na pytańnie pra supraćpakazańni adkazać nie mahu. Ja nie miedyk. A viarnuć nakidku ŭ vas nie atrymajecca, bo heta tavar miedycynskaha pryznačeńnia. Treba było lepš dumać pierad pakupkaj.
Anałahičny adkaz atrymali padčas asabistaj sustrečy z pradstaŭnikami firmy. Siamja napisała pretenzii ŭ prakuratury Vilejskaha rajona i Minskaj vobłaści, u firmu «Bazis pośpiechu». Ciapier čakajuć adkazaŭ.
Jury ŭžo znajšoŭ ludziej, jakija paciarpieli ad hetaj firmy. Niekatoryja pahadzilisia napisać ahulnuju skarhu, niekatoryja — nie, kažuć: sami vinavatyja, raz padpisali kredytnuju damovu. Cikava, što ŭ Vilejcy firma pracavała pad nazvaj «Bazis pośpiechu», u inšych haradach — «Karaleva-sici», abo «Alaŭcina plus».
— Sa svajoj prablemaj my budziem raźbiracca sami, — kaža Jury. — Ale vielmi nie chaciełasia b, kab u takija situacyi traplali inšyja stałyja ludzi. Kali my pryjazdžali ŭ tuju firmu raźbiracca, na stale ja bačyŭ vializny stos takich zaprašeńniaŭ, jakija atrymała maci. Heta ž stolki patencyjna padmanutych ludziej!
Staršynia Biełaruskaha tavarystva achovy spažyŭcoŭ Hanna Suša skazała, što padobnyja zvaroty ŭ ich słužbu vielmi častyja.
— Takaja praktyka nazyvajecca pramymi prodažami. Ludziej zaprašajuć na prezientacyju i adrazu tam pradajuć niejki tavar. Atrymlivajecca, sami pryjšli, sami padpisali… Kaniešnie, škoda ludziej. Ale ž chto ž tut vinavaty?
Pa słovach Hanny Sušy, mahčymaść viartańnia zaležyć ad tavaraŭ. Kali heta posud abo niavykarystanyja koŭdry i paduški, viarnuć tavar možna. Adzinaje, takija tavary treba viartać abo padčas inšaj prezientacyi hetaha pradaŭca ŭ vašym ci bližejšym horadzie, abo samastojna vieźci na firmu. Pierad hetym treba dać na adras arhanizacyi telehramu, što tavar nie padychodzić i vy b chacieli skasavać damovu. Nie varta adpraŭlać tavar pa pošcie. Pa słovach Hanny Uładzimiraŭny, u Hrodnie paštovyja adździaleńni prosta zavalenyja viernutymi tavarami, ale ich nichto nie zabiraje.
U tavarystvie abarony spažyŭcoŭ nam rastłumačyli, što masažnuju vibranakidku viarnuć uvohule nielha, bo heta składanaje techničnaje prystasavańnie.
Padčas takich prezientacyj śpiecyjalist raić patencyjnym pakupnikam abaviazkova raicca z rodnymi pa mabilnym telefonie. Ale viadomyja ŭžo i takija vypadki, kali na padobnych prezientacyjach telefony mohuć paprasić adklučyć.
Va ŭpraŭleńni Śledčaha kamiteta nam paviedamili, što padobnyja spravy tut pakul nie razhladali.
