Zaołahi ŭ Brytanii praviali ekśpierymient z «kaniami ŭ palito» i vyśvietlili, navošta ziebry pałoski na ciele. U časopisie PLoS One byŭ apisany ekśpierymient navukoŭcaŭ, jakija nadzieli na koniej pałasataje palito, kab zrazumieć, što dajuć pałoski nasielnikam afrykanskich savan. Akazałasia, što pałoski pieraškadžajuć ślapicam sadzicca na ich.
«Ślapicy pralatajuć mima pałosak abo ŭtykajucca ŭ ich, čaho amal nikoli nie adbyvajecca z końmi. Dziakujučy hetamu muchi značna radziej sadziacca na cieła ziebraŭ», — rastłumačyŭ Cim Karo z Brystalskaha ŭniviersiteta.
Pryznačeńnie pałosak u ziebraŭ i tyhraŭ da hetaha času zastajecca pradmietam sprečak śpiecyjalistaŭ. Adny ličać, što jany dapamahajuć ziebry «źlivacca» z krajavidami savan, chavajučysia ad drapiežnikaŭ, inšyja ŭpeŭnienyja, što jany dapamahajuć astudžać siabie i mieć znosiny adzin z adnym.
Brytanskija navukoŭcy byli ŭpeŭnieny, što pałoski pieraškodziać ślapicam i inšym kazurkam acanić adlehłaść da cieła ziebry. Tamu jany apranuli koniej u «kaścium ziebry». Kazurki kružyli nad imi hetak ža časta, jak i nad čornymi i biełymi końmi.
Ale jak tolki muchi nabližalisia da ziebry, ich niešta ślapiła, jany nie mahli kantralavać pasadku. Muchi nabližalisia zanadta chutka, ale adchilalisia ad ziebry abo natykalisia na jaje i adskokvali.
