Ananimny telehram-kanał «Kramloŭski biazbašańnik» raspaŭsiudziŭ čutku, što bližejšym časam ź Biełarusi budzie adklikany mitrapalit Pavieł, jaki ŭznačalvaje Biełaruskuju pravasłaŭnuju carkvu apošnija piać hadoŭ.
Mitrapalit Pavieł. Fota Siarhieja Hudzilina.
Da hetaha Pavieł byŭ mitrapalitam u Razani, biełaruskaha hramadzianstva jon nie pryniaŭ pa siońnia.
Pryčynami niezadavalnieńnia pracaj Paŭła nazyvajecca «pravał pracy», u pryvatnaści, dalejšy raspaŭsiud u Biełarusi katalickaj carkvy. Ad novaha mitrapalita buduć čakać «dalejšych intehracyjnych pracesaŭ».
Telehram-kanał navat nazyvaje mahčymych źmienščykaŭ Paŭła. Najpierš — heta mitrapalit Pskoŭski Cichan (Šaŭkunoŭ). U adroźnieńnie ad Paŭła, Cichan ličycca intelektuałam. Jon hałoŭny redaktar sajta Pravasłaŭje.ru. Pra Cichana kažuć, što jon maje ciesnyja kantakty z Uładzimiram Pucinym, navat ličycca jahonym nieaficyjnym duchoŭnikam.
Mitrapalitam Cichan staŭ tolki ŭ mai 2018 hoda, da hetaha času jon uznačalvaŭ patryjaršuju radu pa kultury (praciahvaje zajmacca hetaj pracaj i ciapier). Cichanu 60 hadoŭ. Niekatoryja ličać, što jon moža źmianić Kiryła na pasadzie patryjarcha.
A voś mitrapalit Kazanski Fieafan (Ašurkaŭ) maje ŭžo 71 hod. Jon pabyŭ mitrapalitam va Uljanaŭsku, Staŭrapali, Čelabinsku, jepiskapam u Mahadanie. Dyjakan Kurajeŭ kaža, što heta «vielmi razumny čałaviek z dośviedam pracy ŭ musulmanskich rehijonach». Aproč Tatarstana, jamu davodziłasia pracavać u Jehipcie i Izraili.
I treciaj kandydaturaj nazyvajecca mitrapalit Krasnajarski Panciejlamon (Kutavy). Napeŭna, tamu, što jon narodžany ŭ Biełarusi. Naradziŭsia Panciejlamon u vioscy Hrybany Mahiloŭskaha rajona, ale ad 5 hadoŭ žyŭ u Sibiry. Ad 1993 da 2000 źjaŭlaŭsia jepiskapam Bałtyjskim, dzie pracavaŭ z katolikami i pratestantami.
Zrešty, stavicca surjozna da hetaj «analityki» nie vypadaje. U hetaj ža samaj natatcy napisana, što mitrapalit Pavieł byŭ u 1992 hodzie zavierbavany śpiecsłužbami ZŠA, kali tam pracavaŭ. Nie pieršy raz modnyja rasijskija telehram-kanały publikujuć pra Biełaruś achinieju.
