U hateli «Biełaruś» 20 śniežnia 2018 hoda adbyŭsia ahulny jeparchijalny schod Minskaj jeparchii.
Prezidyum uznačaliŭ mitrapalit Pavieł, aproč taho, u prezidyumie byli archijepiskap Huryj, jepiskap Baraŭlanski Ihnacij, archimandryty Sierhij Bryč i Sierhij Akimaŭ, prataijerej Andrej Vołkaŭ.
Mitrapalit Pavieł.
Jak infarmuje sajt jeparchii, na schodzie prysutničaŭ 281 čałaviek, asnoŭnymi temami było abrańnie novaj jeparchijalnaj rady i jeparchijalnaha suda.
Jak paviedamili prysutnyja na schodzie, pa hetych pytańniach roznahałośsiaŭ nie ŭźnikła.
Ale, jak raskazali «Našaj Nivie», dziŭnaja situacyja skłałasia vakoł «Zajavy ahulnaha schodu minskaj jeparchii».
Tekst hetaj zajavy apublikavany ŭ internecie, u joj u piaci asobnych punktach pravodzicca krytyka Kanstancinopalskaha patryjarcha i Pravasłaŭnaj carkvy Ukrainy.
«Adzinahałosna padtrymać rašeńni Sinoda RPC […] ab pryznańni niemahčymym padtrymańnia jeŭcharystyčnych adnosin z Kanstancinopalskim patryjachratam», «Vykazać ščyruju synoŭniuju ŭdziačnaść Śviaciejšamu Patryjarchu Maskoŭskamu […]», «Vykazać braterskuju padtrymku mitrapalitu Kijeŭskamu [Maskoŭskaha patryjarchata]», «Pryznać raskolnickim tavarystvam hetak zvanuju […]», — takimi farmuloŭkami napoŭnienaja hetaja zajava.
Jak kažuć surazmoŭcy «Našaj Nivy», jakija prysutničali na hetym schodzie, słovy na sajcie Jeparchii pra «adzinahałosnuju padtrymku» — pierabolšanyja.
«Častka śviataroŭ była nie hatovaja padtrymać taki tekst. Z hetaj zajavaj adbyłasia niezrazumiełaja situacyja: čamu mitrapalit Pavieł vyrašyŭ vynieści jaje na paradak dnia? Chto ŭvohule prasiŭ nas vykazvacca pa takich pytańniach? Tradycyjna niejkija važnyja zajavy ŭzhadniajucca z kožnym — teksty dasyłajucca papiarednie, kab kožny pačytaŭ i ŭ momant abmierkavańnia vykazaŭ svaje zaŭvahi. Tut ža ničoha takoha nie było, Pavieł zahadaŭ prosta tam, na schodzie, raspracavać tekst, vielmi chutka jaho stvaryli. Kali jaho začytali, pavisła nieparazumieńnie.
Uvohule, jak adbyvajecca takoje hałasavańnie? Patryjaršy ekzarch pytajecca «Chto «za»?», padymaje ruki niejkaja kolkaść ludziej, robicca vyhlad, što ich adrazu padličyli, i tut ža jon chutka kaža: «utrymalisia-suprać? Niama, pryniata adzinahałosna». Heta zajmaje mienš za siekundu, takaja moŭnaja ekvilibrystyka, kab častka z tych, chto realna ŭstrymaŭsia, nie paśpieli padniać ruku, a tyja, chto suprać, ale padniali ruku, vyhladali nibyta jany «ŭstrymalisia».
I tut Pavieł zajaviŭ, što rašeńnie pryniataje adzinahałosna, suprać nikoha niama. Pačulisia hałasy pary niezadavolenych, Pavieł ža skazaŭ, što «nijakich vystupleńniaŭ ź miesca». Takim čynam, hetamu tekstu byŭ nadadzieny vyhlad usieahulnaha mierkavańnia, chacia heta nie adpaviadaje stanu rečaŭ», — raskazaŭ nam minski śviatar.
Jak kaža pravasłaŭny baciuška, u takim tekście na hety momant niama patreby, jon raspalvaje varažnieču.
My spytalisia jašče ŭ niekalkich śviataroŭ, jakija tam prysutničali. Varta adznačyć, što dvoje ź ich nie hatovyja paćvierdzić, što sapraŭdy mieŭ miesca niejki demarš.
«Ja siadzieŭ z kraju. Zdajecca, ja nie bačyŭ ruk, padniatych «suprać» abo jakija «ŭstrymalisia». Ale ja i nie mahu skazać, što bačyŭ, jak usie padniali ruku «za», — skazaŭ nam śviatar z Malinaŭki.
Inšy śviatar, z Kamiennaj Horki, śviedčyć, što rašeńnie ab hetym tekście było adzinahałosnym. Jon śćviardžaje, što bačyŭ, jak usie —281 čałaviek — prahałasavali «za».
U toj ža momant adchileny sa skandałam minski śviatar Alaksandr Šramko ŭ svaim fejsbuku paviedamlaje, što prynamsi adzin jahony znajomy skazaŭ jamu, što publična hałasavaŭ «suprać», jašče niekatoryja — ustrymalisia.
Što znajomy Šramka, što našy krynicy prosiać nie nazyvać ichnich imionaŭ, «kab nie pieranosić unutranyja pikiroŭki ŭ miedyjnuju prastoru».
