U Biełarusi raspracavali prajekt zakona «Ab pravach invalidaŭ i ich sacyjalnaj intehracyi». Pa płanach, u krasaviku jaho uniasuć u parłamient. Kali ŭsio projdzie hładka, z 1 studzienia 2023 hoda ŭ krainie najmalnikam ŭstalujuć kvotu dla pryjomu na pracu ludziej ź invalidnaściu, piša TUT.by sa spasyłkaj na Ministerstva pracy i sacyjalnaj abarony.
U dakumiencie paznačana, što najmalnikam ustaloŭvajecca kvota dla pryjomu na pracu ludziej ź invalidnaściu «u pamiery 3% ad siaredniaśpisačnaj kolkaści rabotnikaŭ». U hetuju kolkaść nie ŭnosiacca rabotniki, u jakich škodnyja i/abo niebiaśpiečnyja ŭmovy pracy. Ad kvoty vyzvalajucca arhanizacyi, majomaść jakich znachodzicca va ŭłasnaści hramadskich abjadnańniaŭ ludziej ź invalidnaściu.
Miascovyja orhany ŭłady vyznačajuć minimalnuju kolkaść pracoŭnych miescaŭ (u tym liku śpiecyjalizavanych) dla ludziej ź invalidnaściu. Saŭmin vyznačaje paradak ŭstanaŭleńnia kvoty i jaje vykanańnia.
Adznačym, što ŭ Rasiei takaja kvota ŭžo dziejničaje.
Prajekt zakona praduhledžvaje i inšyja artykuły. Naprykład, siomy — ab zabaronie dyskryminacyi pa prykmiecie invalidnaści. U dadzienym vypadku pad dyskryminacyjaj majecca na ŭvazie luboje adroźnieńnie, vyklučeńnie abo abmiežavańnie pa pryčynie invalidnaści, kali heta robiać z metaj prynižeńnia abo admaŭleńnia pravoŭ i svabod čałavieka.
