Śledčy kamitet admoviŭ hałoŭnamu redaktaru TUT.BY Marynie Zołatavaj u zadavalnieńni paŭtornaha chadajnictva ab spynieńni kryminalnaha pieraśledu pavodle 86-ha artykuła Kryminalnaha kodeksa.
U adpaviednaści z hetym artykułam asoba, jakaja ŭpieršyniu ŭčyniła złačynstva, jakoje nie ŭjaŭlaje vialikaj hramadskaj niebiaśpieki, abo mienš ciažkaje złačynstva i kampiensavała škodu, moža być vyzvalena ad kryminalnaj adkaznaści z pryciahnieńniem da administracyjnaj, kali budzie pryznana, što dla jaje vypraŭleńnia dosyć prymianieńnia mier administracyjnaha spahnańnia.
Chadajnictva Zołatava padała ŭ kancy śniežnia, aznajomiŭšysia z materyjałami «spravy BiełTA». Heta ŭžo jaje druhoje chadajnictva, ź pieršym hałoŭred TUT.BY źviartałasia paśla zakančeńnia rasśledavańnia.
Rašeńnie ab admovie śledčy Siamienik paviedamiŭ advakatu Zołatavaj pa telefonie. SK taksama admoviŭsia zadavolić chadajnictva abaroncy ab spynieńni kryminalnaha pieraśledu ŭ suviazi z adsutnaściu składu złačynstva.
U bližejšy čas materyjały spravy buduć pieradadzienyja ŭ prakuraturu.
Nahadajem, Zołatava zastałasia adzinaj abvinavačvanaj pa «spravie BiełTA», astatnija fihuranty - 14 supracoŭnikaŭ roznych ŚMI - byli vyzvalenyja ad kryminalnaj adkaznaści z pryciahnieńniem da administracyjnaj. Akramia štrafaŭ, žurnalisty byli abaviazany kampiensavać vystaŭlenuju škodu. Sumy roznyja - ad 3 da 17 tysiač rubloŭ.
Hałoŭreda TUT.BY abvinavačvajuć pa č. 2 art. 425 Kryminalnaha kodeksa (Biaździejnaść słužbovaj asoby), sankcyja artykułu - ad štrafu i da 5 hadoŭ pazbaŭleńnia voli.
7 žniŭnia ŭ ofisach kampanij TUT.BY i BiełaPAN prajšli pieratrusy i zatrymańni. Byli zatrymanyja hałoŭny redaktar TUT.BY Maryna Zołatava, redaktary partała Hanna Kałtyhina, Halina Ułasik i Hanna Jermačonak, hałoŭny redaktar BiełaPAN Iryna Leŭšyna i mižnarodny ahladalnik Taćciana Karaviankova, ułaskar «Niamieckaj chvali» Pavał Bykoŭski i redaktar internet-sajtu haziety «Biełarusy i rynak »Alaksiej Žukaŭ. Usie jany praviali pa niekalki sutak u izalatary časovaha ŭtrymańnia na Akreścina. Žurnalistaŭ i redakcyi padtrymali Jeŭrasajuz, Rada Jeŭropy, ZŠA, a taksama mižnarodnyja pravaabarončyja arhanizacyi.
