Hałoŭnaja redaktarka Tut.by Maryna Zołatava raskazała ŭ prahramie «Tok» pra toje, jak dziaržava sprabavała ŭmiešvacca ŭ redakcyjnuju palityku partała.
— Ci sprabuje ŭłada zaraz kantralavać Tut.by? Naviazvać niejki tam paradak dnia, sprabavać źniać materyjały, sprabavać naviazać, u jakim rečyščy aśviatlać padziei — cenzura?
— Viedajecie što? Vielmi dziŭna, ale takich sprobaŭ nie było ŭžo daŭno. Ja mahu skazać, što niešta takoje było paśla vybaraŭ 2010 hoda, ale ciapier…
— A možacie pryvieści prykład, što heta byli za sproby?
— Heta było paśla vybaraŭ 2010 hoda i heta było ŭ kancy 2014, kali byli ekanamičny kryzis i roznyja tam čakańni, devalvacyjnyja i ŭsio takoje. Paśla vybaraŭ 2010 heta byli niejkija sihnały kiraŭnictvu ad peŭnych asob, što treba aściarožna: «nie pišycie pra toje», «navošta vy heta robicie?». Ja tak razumieju, niejkija adkrytyja pahrozy byli.
— Vy majecie na ŭvazie, što Zisiera vyklikali da kahości ŭ Ministerstva infarmacyi, u Administracyju prezidenta?
— Jak heta było dakładna — ci jon sam chadziŭ, ci jamu telefanavali, ci niekamu inšamu, — ja skazać nie mahu. Heta lepš u jaho samoha spytacca. Ale toje, što takija pahrozy byli, kantakty byli, heta dakładna.
— Jak źmianiałasia vaša redakcyjnaja palityka paśla hetaha?
— My nie davali rečy, u jakich my nie ŭpeŭnienyja. Dzie ŭ nas niama dokazaŭ, naprykład. Vielmi ciažka zaraz pryvieści kankretnyja prykłady pa tym, što było ŭ 2010-2011 hodzie. Ale dakładna, što «maŭklivyja akcyi», jakija byli ŭ 2011 hodzie, my, kaniečnie, aśviatlali, ničoha nie prapuskali. I, mnie zdajecca, što aśviatlali dobra. Što da padziej kanca 2014 hoda, to tady — ja dumaju ŭsie heta dobra viedajuć — vyklikali hałoŭnych redaktaraŭ niezaležnych miedyja da ministra infarmacyi. Tam była z nami praviedziena razmova, što treba spakojna aśviatlać padziei, jakija adbyvajucca ŭ krainie. Za prykład brać ahienctva BiełTA, niešta ŭ takim klučy. Tady jašče Lilija Ananič razmaŭlała.
