Kniharnia «Akademičnaja kniha» prapanuje padborku vydańniaŭ, jakija karystalisia najbolšaj papularnaściu ŭ kastryčniku.
Viktar Marcinovič. Noč
Novaja kniha Viktara Marcinoviča padajecca jak rukapis nieviadomaha aŭtara,
što byŭ nabyty Sacišam Sivačaryjaram u bienhalskaha kramnika za litr čystaj vady, pasmu pradziva i paru amal nie nošanych słancaŭ. Rukapis, śpisany niezrazumiełymi kiryličnymi piśmionami, byŭ dbajna pierakładzieny aŭtaram znachodki na anhlijskuju movu. Biełaruski piśmieńnik padrychtavaŭ pierakład dla vydańnia na radzimie z raźlikam na šyrokaje koła čytačoŭ.
Bahusłaŭ Radzivił: Niamiecki prync ź Vialikaha Kniastva Litoŭskaha
Histaryčny raman viadomaj ukrainskaj piśmieńnicy Iryny Danieŭskaj, pryśviečany junactvu i maładym hadam znakamitaha pradstaŭnika mahutnaha mahnackaha rodu z VKŁ.
Aŭtarka, abapirajučysia na dakumienty epochi, stvaraje šyrokaje pałatno burlivaha žyćcia Bahusłava Radziviła. Jon uvajšoŭ u historyju nie tolki jak talenavity palityk i dypłamat, ale i prasłaviŭsia podźvihami na amurnym poli, skaryŭšy serca nie adnoj pryhažuni…
Adam Mickievič. Pan Tadevuš, abo Apošni najezd u Litvie
«Šlachieckaja historyja z 1811 i 1812 hh. u dvanaccaci knihach vieršaŭ» prapanujecca ŭ pierakładzie na biełaruskuju Piatra Bitela ź ilustracyjami Vasila Šaranhoviča.
«Pan Tadevuš» — adzin z najviadomiejšych tvoraŭ Adama Mickieviča, u jakim aŭtar uvasobiŭ vobraz Litvy z 1811 i 1812 hh. padčas svajho znachodžańnia ŭ vyhnańni. Jon złučyŭ roznyja temy: śvietły vobraz luboŭnych pryhod maładoha Tadevuša, historyju sprečak šlachty za majontak i, narešcie, historyju padzieńnia, pakajańnia i reabilitacyi Jacka Saplicy.
Ściežkami žyćcia. Paŭlina Miadziołka
U vydańni ŭpieršyniu pad adnoj vokładkaj drukujucca niecenzuravanyja ŭspaminy dziajački biełaruskaha adradžeńnia.
Jaje bijahrafija była źviazanaja z mnohimi histaryčnymi padziejami, jakija adbyvalisia ŭ Biełarusi ŭ XX st., a siarod jaje znajomych byli Kupała, Ciotka, Biadula, Jezavitaŭ, braty Łuckievičy… «Ściežki žyćcia» viaduć u biełaruskija miastečki, darevalucyjnuju Vilniu, Pieciarburh, pa šlachach biežanstva, turmaŭ i vysyłki. Hetaja kniha — pra znakavyja histaryčnyja padziei i pra nievierahodnyja žyćciovyja vyprabavańni samoj Paŭliny Miadziołki.
Hetyja dy inšyja vydańni možna znajści ŭ «Akademičnaj knizie» (pr.Niezaležnaści, 72) abo zamović na sajcie kniharni.
