Fota: kremlin.ru.
Ahladalnik «Rosbałta» źviartaje ŭvahu, što rejtynh Pucina ŭpaŭ na dakrymski ŭzrovień. U minuły raz, kali fiksavaŭsia nizki rejtynh, była arhanizavana ekstranaja apieracyja ŭ Krymie. Paŭvostraŭ dałučyli da Rasii — i rejtynh uźlacieŭ da niabiosaŭ. Što zrobić Pucin zaraz?
Pieršaje, što prychodzić u hałavu, — dałučeńnie Danbasa, piša Travin. Adnak jon dumaje, što takim prostym šlacham Kreml nie pojdzie. Terytoryja ŭschodniaj Ukrainy razburanaja i razrabavanaja vajennym kanfliktam, i Rasii jana nie patrebna. Akramia taho, Danbas, pa sutnaści, daŭno ad Ukrainy adkałoli. Dałučeńnie prablemnaha Danbasa nie padymie rejtynh Pucina vysoka.
Dałučeńnie Abchazii, Paŭdniovaj Asiecii ci Prydniastroŭja vykliča novyja sankcyi z boku Zachadu, i taksama nie budzie ŭspryniata rasijskim abyvacielem jak niešta epachalnaje.
Pa-sapraŭdnamu mocnaj akcyjaj stała b ŭvarvańnie ŭ adnu z krain NATA. Adnak padobny varyjant «Rosbałt» całkam vyklučaje.
«U Kramla jość tolki adzin aptymalny varyjant padtrymki rejtynhu i adnačasova — rašeńnia prablemy-2024 (h.zn. zachavańnia vyšejšaj ułady ŭ rukach Pucina paśla zakančeńnia jaho čaćviortaha terminu). I źviazany hety varyjant ź Biełaruśsiu»,
— piša Travin.
Aŭtar źviartaje ŭvahu, što ŭ Rasii ź Biełaruśsiu daŭno ŭžo isnuje sajuznaja dziaržava, jakaja «śpić». Ale reanimavać hetuju chimieru całkam mahčyma. Pryčym dla hetaha nie patrebny radykalnyja kroki.
Travin apisvaje nastupny scenar. Unutry orhanaŭ kiravańnia Rasii i Biełarusi ŭsio zachavajecca pa-raniejšamu. Zastanucca dva prezidenty (naprykład, Łukašenka i Miadźviedzieŭ), dva parłamienty, dva ŭrady, jakija zajmajucca tradycyjna haspadarčymi pytańniami. Ale ŭsie siłavyja i pravaachoŭnyja orhany pierapadparadkujuć sajuznamu kiraŭnictvu. I na sajuznym uzroŭni ŭviaduć novuju pasadu. Naprykład, hienieralny sakratar Sajuznaj dziaržavy Rasii i Biełarusi. Hetuju pasadu zojmie, naturalna, Pucin.
Aŭtar «Rosbałta» ŭpeŭnieny, što ŭ hetym vypadku rejtynh Pucina znoŭ uźlacić, i jon lohka vyjhraje vybary.
«Ruskija buduć ščaślivyja, pakolki Biełaruś vidavočna bolšaja za Krym. Siarod biełarusaŭ nacyjanalny ruch daŭno samim Baćkam zadušany, značyć, surjoznych pratestaŭ čakać nie davodzicca»,
— piša Travin.
Aŭtar upeŭnieny, što Zachad vymušany budzie źmirycca z takim scenaram.
Čytajcie taksama:
Fontanka: Rasija — impierskaja kraina. I biełaruskaje pytańnie joj pryjdziecca rana ci pozna vyrašać
Uładzisłaŭ Inaziemcaŭ: Dla padtrymańnia patryjatyčnaha čadu Rasii treba akupavać ciapier cełuju krainu. I kandydat tut tolki adzin
