U Biełarusi letaś raspačata 5 kryminalnych spraŭ suprać biełarusaŭ, jakija brali ŭdzieł va ŭzbrojenych kanfliktach u inšych krainach, čatyroch asudzili. Pra heta zajaviŭ kiraŭnik MZS Uładzimir Makiej 9 kastryčnika na mižnarodnaj kanfierencyi pa baraćbie z teraryzmam u Minsku, paviedamlaje Tut.by.
— Letaś raspačata piać kryminalnych spraŭ pa artykule, jaki tyčycca ŭdziełu na terytoryi zamiežnaj dziaržavy va ŭzbrojenym kanflikcie, vajennych dziejańniach, viarboŭki albo padrychtoŭki asob da takoha ŭdziełu, asudžana čatyry čałavieki, 12 asobam vyniesieny aficyjnyja papiaredžańni, — skazaŭ kiraŭnik MZS Biełarusi.
Jon taksama padkreśliŭ, što ŭdzieł biełarusaŭ va ŭzbrojenych kanfliktach na terytoryi zamiežnych dziaržaŭ — pahroza nacyjanalnaj biaśpiecy Biełarusi.
