33-hadovaha Vitala Sałaŭčuka dastavili ŭ balnicu imia Botkina ŭ Maskvie ŭ paniadziełak ranicaj. Na biełarusa, jaki pracuje kiroŭcam viadučaj Pieršaha kanała, futbalisty Alaksandr Kakoryn i Pavieł Mamajeŭ napali ŭ toj momant, kali jon čakaŭ žurnalistku.
Fota z fejsbuka Vitala Sałaŭčuka
— Syn u śviadomaści, ja ź im razmaŭlała i siońnia, i ŭčora. Adčuvaje siabie drenna, — raspaviadaje TUT.BY Raisa Ivanaŭna, mama paciarpiełaha Vitala Sałaŭčuka. — Dziakuj Bohu, što mazhi cełyja! Ja sama miedsiastra, dačka i ziać — daktary. Dla nas samaje hałoŭnaje, kab ačuniaŭ.
Biełarusu Vitalu Sałaŭčuku 33 hady, jon rodam z Małaryty. Jak raspaviadaje jaho znajomy, Vital — były handbalist, dva siezony hulaŭ u Breście, zatym pracavaŭ taksistam u Minsku, a hadoŭ piać-siem tamu pierajechaŭ žyć u Maskvu.
— U Vitala vydatny charaktar, ale kali što — tryvać nie budzie, — adznačaje znajomaja Vitala Sałaŭčuka.
U paniadziełak ranicaj Vital na stajancy čakaŭ paśla efiru viadučuju Pieršaha kanała Volhu Ušakovu, u jakoj pracuje kiroŭcam. Ušakova viadzie prahramu «Dobraj ranicy». Mienavita ŭ hety momant na biełarusa napali futbalisty Alaksandr Kakoryn i Pavieł Mamajeŭ.
— Kali syna dastavili ŭ balnicu, rabili ŭsie pracedury, u tym liku MRT, - udakładniaje Raisa Ivanaŭna.
U Vitala zakrytaja čerapna-mazhavaja traŭma, pierałom nosa.
Jak paviedamili TUT.BY u maskoŭskaj balnicy imia Botkina, maładoha čałavieka adrazu ž dastavili ŭ adździaleńnie niejratraŭmatałohii, dzie jon zaraz znachodzicca. Mama źbitaha biełarusa źbirajecca pryjechać da jaho ŭ Maskvu ŭ vychodnyja dni.
— Usio zdaryłasia z 8 da 9 ranicy, nie viedaju, chto vyklikaŭ palicyju i chutkuju. Jany pačali bić plaški kala darahoj mašyny, askiepki palacieli ŭ aŭto, syn prosta vyjšaŭ pahladzieć: padrapanaja mašyna ci nie. Jana kaštuje 30 tysiač dalaraŭ abo bolš, — miarkuje Raisa Ivanaŭna. — I heta była navat nie zaŭvaha, kali jon niešta tam pamurłykaŭ, to navošta chłopcy takoje zrabili? Jon navat nie hladzieŭ u ich bok! A potym chtości staŭ bić Vitala, chtości — mašynu.
