Štohadovy fiestyval «Rok za žyćcio», prymierkavany da Suśvietnaha dnia baraćby suprać śmiarotnaha pakarańnia, prachodzić sioleta ŭžo ŭ treci raz. Kab padtrymać uviadzieńnie maratoryja na vyšejšuju mieru ŭ našaj krainie, papularnyja hurty Nizkiz, «Pietla Pristrastija», «Mutnajevoka», a taksama pieramožcy konkursu znakamitaha fiestyvalu «Basovišča» dvuch apošnich hadoŭ, SnopSnoŭ i Teleport, hrajuć 7 kastryčnika u minskim kłubie Re:Public.
Suśvietny dzień baraćby suprać śmiarotnaha pakarańnia adznačajecca 10 kastryčnika. Jon zasnavany Suśvietnaj kaalicyjaj suprać śmiarotnaha pakarańnia — abjadnańniem prafsajuzaŭ, miascovych i rehijanalnych orhanaŭ ułady, jurydyčnych asacyjacyj, a taksama pravaabarončych arhanizacyj z metaj paŭsiudnaj zabarony na hety vid vyšejšaj miery pakarańnia. Prychilniki ruchu vystupajuć suprać śmiarotnaha pakarańnia va ŭsich vypadkach biez vyklučeńnia, niezaležna ad charaktaru złačynstva, charaktarystyk złačyncy i sposabu, jakim dziaržava pazbaŭlaje žyćcia asudžanaha. Śmiarotnaje pakarańnie parušaje prava na žyćcio, abvieščanaje ŭ Suśvietnaj dekłaracyi pravoŭ čałavieka.
Biełaruś dahetul zastajecca apošniaj jeŭrapiejskaj i adzinaj postsavieckaj krainaj, jakaja prymianiaje śmiarotnaje pakarańnie. Pavodle źviestak pravaabaroncaŭ, za apošnija dvaccać hadoŭ u krainie pakarana bolš za 400 čałaviek.
U papiarednija hady fiestyval «Rok za žyćcio» taksama prachodziŭ ŭ kłubie Re:Public, svaim udziełam ideju admieny śmiarotnaha pakarańnia padtrymali «Daj Darohu!», Akute, Re1ikt i inšyja muzyki. Akramia Minska, letaś muzyki syhrali anałahičny kancert u Breście. A sioleta ŭpieršyniu «Rok za žyćcio» prajšoŭ u Viciebsku.
