Treba viarnuć tavar, a čeka — niama. Što rabić u takoj situacyi: usio ž taki pajści ŭ kramu ci źmirycca z najaŭnaj situacyjaj i pakinuć tavar sabie?
Tym bolš, što słovy pra nieabchodnaść zachavańnia čeka i ŭpakoŭki ŭ vypadku viartańnia albo abmienu tavaru, jak mantra, hučać z vusnaŭ ci nie kožnaha pradaŭca. Mnohija, aryjentujučysia na dadzienyja ŭkazańni, navat nie razhladajuć mahčymaść viartańnia tavaru biez čeka. Ale jak nasamreč? Ci možna viarnuć tavar, kali čeka niama?
Viarnuć tavar, nie majučy čeka, možna. Dadzienaje prava zamacavana ŭ zakonie Biełarusi «Ab abaronie pravoŭ spažyŭcoŭ» (art.20, p.8). Ź jaho novaj redakcyjaj a možna aznajomicca na nacyjanalnym pravavym partale pravo.by.
U pryvatnaści, u zakonie prapisana, što adsutnaść dakumienta, jaki paćviardžaje fakt nabyćcia tavaru, nie źjaŭlajecca pryčynaj dla admovy ŭ viartańni hetaha tavaru. A mienavita takim dakumientam i źjaŭlajecca kasavy ček.
Adpaviedna, kali vy nabyli tavar i pa roznych pryčynach vyrašyli jaho viarnuć, to adsutnaść čeka nie moža być padstavaj dla taho, kab vašaje patrabavańnie nie zadavolili.
Adnak sam fakt nabyćcia tavaru ŭ kankretnym handlovym punkcie daviadziecca dakazać. Pry hetym zakonam praduhledžana, što ŭ jakaści srodkaŭ dokazu mohuć być vykarystany navat pakazańni śviedkaŭ.
Taksama dokazam mohuć słužyć elemienty spažyvieckaj upakoŭki, roznaha kštałtu dakumienty na tavar (techničny pašpart, harantyjny ček, instrukcyja pa vykarystańni). Hałoŭnaje, kab na elemientach upakoŭki i dakumientach byli paznaki, jakija dakazvajuć, što tavar byŭ nabyty ŭ kankretnym handlovym punkcie.
Varta pamiatać i pra toje, što viarnuć abo abmianiać tavar naležnaj jakaści možna na praciahu abmiežavanaha terminu i tolki ŭ tym vypadku, kali jon nie byŭ u vykarystańni, a ŭsie jahonyja spažyvieckija jakaści zachavanyja.
Charčovyja pradukty dobraj jakaści abmianiać i viarnuć nielha!
Sa śpisam niecharčovych tavaraŭ, jakija pry najaŭnaści naležnaj jakaści viarnuć i abmianiać nielha, možna aznajomicca tut.
Ci abaviazkova viartać upakoŭku
Zazvyčaj pytańnie abaviazkovaści zachavańnia ŭpakoŭki źjaŭlajecca nie mienš aktualnym, čym pytańnie najaŭnaści čeka. Dyk što rabić z upakoŭkaj?
Pavodle zakanadaŭstva, u vypadku viartańnia albo abmienu tavaru naležnaj jakaści, kupiec abaviazany viarnuć hety tavar u toj spažyvieckaj upakoŭcy, u jakoj tavar byŭ pradadzieny. Hetaje patrabavańnie zamacavana ŭ najnoŭšaj redakcyi zakona Biełarusi ab «Ab abaronie pravoŭ spažyŭcoŭ» (art. 28, p. 2)
U toj ža čas
dla vypadkaŭ, kali viartajecca tavar nienaležnaj jakaści, najaŭnaść spažyvieckaj upakoŭki źjaŭlajecca nieabaviazkovaj.
Uličvajučy toje, što ŭ vypadku adsutnaści čeka mienavita ŭpakoŭka moža dapamahčy dakazać, što tavar byŭ nabyty ŭ kankretnaha pradaŭca, lepš nie śpiašacca vykidvać jaje.
Ci maje prava pradaviec patrabavać pašpart
Pavodle najnoŭšaj redakcyi zakona ab «Ab abaronie pravoŭ spažyŭcoŭ» (art. 16, p. 1), kali pry zaklučeńni damovy kupli-prodažu dadzienyja dakumienta, što zaśviedčvaje asobu, nie vykarystoŭvalisia, to i ŭ vypadku viartańnia tavaru pradaviec nie maje prava patrabavać taki dakumient ad klijenta.
Kali, kuplajučy tavar, vy pašpart nie pakazvali, to i pry viartańni hetaha tavaru pakazvać pašpart nie abaviazanyja.
Pryjemnych nabytkaŭ! I niachaj viedańnie svaich pravoŭ dapamoža paźbiehnuć niepryjemnych situacyj.
