Isnuje mierkavańnie, što viek nafty sychodzić u niabyt. Ci značyć heta, što ahłušalny ryk matacykletnych matoraŭ taksama nieŭzabavie zrobicca historyjaj? Nie fakt. Prynamsi, matacykły zdavacca nie źbirajucca. Naadvarot — elektryčnyja ruchaviki dajuć mahčymaść ekśpierymientavać z dyzajnam. Voś niekalki cikavych ekziemplaraŭ.
Harley Davidson LiveWire (ZŠA)
Tak-tak, lehiendarny amierykanski motavytvorca nie žadaje zastacca na ŭzbočynie elektryčnaj revalucyi. U žniŭni Harley Davidson prezientavaŭ ułasny pratatyp elektrabajka LiveWire. Kampanija charaktaryzuje jaho jak «mahutny, ale lohki ŭ kiravańni». Jak miarkujecca, elektryčny «charlej» trapić u prodaž naleta.
Darečy, samuju pieršuju viersiju svajho elektrabajka Harley Davidson prezientavaŭ publicy ŭ 2014 h. Taja sproba, zdajecca, była falstartam — dla masavaha vypusku elektramatacykłaŭ rynak byŭ jašče nie hatovy. Tym nie mienš, jak śćviardžaje kampanija na svaim sajcie, napracoŭki čatyrochhadovaj daŭniny buduć uklučanyja ŭ novuju madel.
Light Rider (Hiermanija)
Bijałahičny dyzajn Light Rider — plon pracy majsterni APWorks, što na paŭdniovym uskrajku Miunchiena. Bavarskija majstry pazicyjanujuć jaho jak pieršy ŭ śviecie pratatyp elektryčnaha matacykłu, nadrukavany na 3-D pryntary.
Elektraruchavik razhaniaje bajk da 80 kiłamietraŭ za hadzinu. Małavata? Nu ale ž zatoje sam matacykł važyć usiaho tolki 35 kiłahramaŭ. Lohkaściu matacykł abaviazany najpierš vysokatechnałahičnaj 6-kiłahramovaj ramie.
Miž inšym, struktura ramy nahadvaje kosnuju tkanku čałavieka:
Energico Eva (Italija)
Kab vy nie dumali, što bolšaść elektrabajkaŭ — heta nasamreč cichachodnyja skutary ŭ matacykletnaj skury, voś vam matacykł ź niaŭrymślivym italjanskim charaktaram. Energico. Fabryka z paŭnočnaitaljanskaj Madeny, śpiecyjalizujecca vyklučna na vyrabie elektramatacykłaŭ. Jaje madel Eva moža prajechać da 200 kiłamietraŭ na adnoj zaradcy (u enierhaźbierahalnym režymie), a taksama razhaniajecca da 200 kiłamietraŭ za hadzinu. Energico rekłamuje madel pad chešteham «moj elektryčny hrech» (italjancy jość italjancy!).
Fotazdymak z brašury kampanii (Eva sprava):
Zero DS (ZŠA)
Kampanija Zero naradziłasia ŭ haražy ŭ miastečku Santa Kruz, pad jarkim kalifarnijskim soncam. Na siońnia heta adzin z samych surjoznych vytvorcaŭ sieryjnych elektrabajkaŭ. Pieršyja elektrabajki Zero vyrabiła jašče ŭ 2006 h. Nielha skazać, što matacykł uražvaje aryhinalnym dyzajnam — u pryncypie, jahomožna było b pierabłytać sa zvyčajnym bajkam, kali b nie cichi elektryčny ruchavik.
Elektryčnaść zalivać siudy…
Typovaja zaradka Zero DS zajmaje kala hadziny. Doŭha? Kamu jak. Kampanija raić skarystać čas, pakul vaš bajk zaradžajecca, schadzić na łanč dy zavieści pryjemnaje znajomstva:
BMW Vision Next 100 (Hiermanija)
Hety zvyšsučasny matacykł niemahčyma nabyć ci pateścić — jon isnuje tolki ŭ vyhladzie virtualnaha kanceptu. Prykładna tak kampanija BMW ujaŭlaje svoj budučy elektrabajk. I što z taho, što jon isnuje pakul što tolki va ŭjaŭleńni dyzajnieraŭ? Kali realny bajk budzie choć u niečym padobny da hetaha, jon maje ŭsie šancy zrabicca sapraŭdnym chitom. Daŭžej zaprahaješ — šparčej jedzieš:
Lito Sora (Kanada)
Budaŭniki elektrabajkaŭ z kanadskaha Kviebieku stvaryli sapraŭdy ołd-tajmier budučyni. Matacykł navat maje paliŭny bak — choć nasamreč u im znachodzicca akumulatar, jaki dazvalaje Lito Sora prajechać da 120 kiłamietraŭ biez zaradki. Elektrabajk zdolny razahnacca da 120 kiłamietraŭ za hadzinu.
Johammer J1 (Aŭstryja)
U hety elektrabajk možna lohka zakachacca —
kali, kaniečnie, vy nie z tych sarkastyčnych kamientataraŭ, jakija paraŭnoŭvajuć J1 ź ladoŭniaj na kołach. Bolš ramantyčnyja naziralniki, zaŭvažajuć padabienstva dyzajnu korpusa elektrabajka z ekipiroŭkaj kania na siaredniaviečnym rycarskim turniry:
J1 — heta nie kancept, a sapraŭdny matacykł, jaki možna nabyć. Ź pieravahaŭ — davoli vialiki zapas chodu. Adna zaradka dazvalaje prajechać 200 kiłamietraŭ.
Korpus elektrabajka možna zamović u piaci roznych kolerach, uklučna z sałatavym:
