Łuka Modryč, fifa.com
Ispanskaje vydańnie El Mundo paviedamlaje, što futbalist supracoŭničaŭ sa śledstvam i pryznaŭ niavypłatu €870.728.
Modryč vyvieŭ praź firmu, zarehistravanuju ŭ Luksiemburhu na imia jaho žonki, €290.990 u 2013 hodzie i €579.738 u 2014 hodzie.
Miarkujecca, što zamiest adbyćcia terminu Modryč zapłacić štraf pamieram €60 tysiač (pa €250 za kožny dzień ŭmoŭnaha źniavoleńnia).
Pavodle ispanskaha zakanadaŭstva, abvinavačany, jaki atrymaŭ termin mienš za dva hady za ŭchileńnie ad padatkaŭ, vyzvalajecca ad turemnaha źniavoleńnia.
Akramia taho, jon pavinien budzie kampiensavać 40% sumy niavypłačanych padatkaŭ, heta značyć bolš za €348 tysiač. Na pačatku sudovaha razboru futbalist taksama vypłaciŭ €1 miljon.
Modryč vystupaje za «Reał» z 2012 hoda. Futbalist pierajšoŭ u ispanski kłub z «Totenchema» za £33 miljony. U minułym siezonie futbalist razam z kamandaj treci raz zapar vyjhraŭ Lihu čempijonaŭ.
Na ČS u Rasii Modryč vystupaŭ u roli kapitana zbornaj Charvatyi. Na turniry kamanda zavajavała siarebranyja miedali, sastupiŭšy ŭ finale Francyi ź likam 2:4. Hety vynik staŭ najlepšym u historyi charvackaj kamandy. Modryč byŭ pryznany lepšym hulcom turniru, a taksama pretenduje na zvańnie futbalista hoda pa viersii FIFA.
Modryč staŭ nie pieršym futbalistam «Reała», asudžanym za ŭchileńnie ad padatkaŭ.
Raniej ŭmoŭnyja terminy za anałahičnyja praviny atrymlivali Kryšcijanu Ranałdu i Marseła. U 2017 hodzie vinavatym u niavypłacie padatkaŭ byŭ taksama pryznany forvard «Barsiełony» Lijanel Miesi.
