Pieramožcy «Basovišča‑2008» haradzienski hurt Tlusta Lusta prezentujuć «Blin piersy» — mienavita tak zaviecca ich debiutnaja praca.
«Na našych kancertach zvyčajna nie čuvać słovaŭ u pieśniach, dyk ciapier urešcie pačujecie, pra što my śpiavajem», — kaža lider kamandy Kirył Bohuš. Haradziency pisali albom na ŭłasnyja hrošy, choć u jakaści pryzu atrymali 20 hadzinaŭ biaspłatnaha zapisu na studyi ŭ Biełastoku. «Ale paśla «Basovišča» da nas nichto nakont zapisu nie źviarnuŭsia, tamu my pajechali ŭ Vaŭkavysk i zapisali albom tam», — kaža Kirył.
Akrom zapisu ŭ studyi, Tlusta Lusta na «Basoviščy» atrymała jašče adzin pryz — zdymki klipa na telekanale «Biełsat». «Ale adtul taksama maŭčok, — apaviadaje Kirył Bohuš. — Ja nia žalusia, ale prosta nie razumieju, jak być z tymi pryzami — ci nam samim šukać tych, chto nam ich uručyŭ».
Tlusta Lusta vyrašyła nie siadzieć na piečy ŭ čakańni zaprašeńnia i zapisała albom na svaje hrošy ŭ studyi ŭ Vaŭkavysku. «Nam padabajecca tam pracavać, vielmi ŭtulna», — kaža Kirył. U vyniku dvuchmiesiacovaj pracy i źjaviŭsia dysk «Blin piersy», kudy ŭvajšli 11 piesień. «My viedajem, što buduć pamyłki, ale my staralisia jak mahli. I navat niečakana dla siabie adznačyli paśla prasłuchoŭvańnia hatovaha materyjału: atrymałasia fajna. Na našych kancertach zvyčajna nie čuvać słovaŭ u pieśniach, dyk ciapier urešcie pačujecie? pra što my śpiavajem», — kaža lider Tlusta Lusta.
Akrom viadomaha ŭžo pa kancertnych vystupach haradziencaŭ kaveru na pieśniu MakSim, na dysku jość jašče adna čužaja pieśnia — na adzin z tvoraŭ hierojaŭ haradzienskaha pank‑roku — hurta Deviation. I na hetym Tlusta Lusta nie spyniłasia — zusim niadaŭna jany zapisali jašče adzin kaver na pieśniu «Pacałunak» hurta Neuro Dubel. «U naš albom jana nie ŭvajšła, ale ja ŭžo razmaŭlaŭ z Alaksandram Kullinkovičam. Hety tvor napeŭna ŭvojdzie ŭ trybjut hurte», — kaža Kirył.
Hurt Tlusta Lusta padtrymaje kamanda Pita Paŭłava GARADzKIJA. «Jany padychodziać nam pa stylistycy, a da ŭsiaho ich dysk ja doma słuchaju», — kaža Kirył. A Pit adznačyŭ, što «hetym kancertam jany chočuć padsumavać usie svaje papiarednija vystupy dy spraŭdzić u kancertnych umovach hučańnie novych piesień».
26 listapada ŭ DA‑club (vuł. P.Broŭki, 22) u 19:00.
Kvitki: 15—20 tys. rubloŭ, zamova praz teł.: (029) 649‑08‑88, (029) 688‑61‑74.
