Urad Ispanii pryniaŭ dekret pra pierapachavańnie astankaŭ byłoha lidara krainy Fransiska Franka. Takoje rašeńnie pryniali paśla niekalkich dziesiacihodździaŭ sprečak u hramadstvie i va ŭładnych kołach — adnak dakumient jašče pavinien atrymać padtrymku parłamienta.
Astanki Franka paśla jaho śmierci byli pachavanyja ŭ Dalinie Zahinuŭšych, manumientalnym kompleksie za 60 kiłamietraŭ ad Madryda, jaki budavaŭsia pa zahadzie samoha dyktatara paśla zakančeńnia hramadzianskaj vajny 1936-39 hadoŭ. U Dalinie pachavanyja bolš za 34 tysiačy čałaviek z abodvuch vajujučych bakoŭ.
Dakumient unosić źmieny ŭ zakon ab histaryčnaj pamiaci, pryniaty ŭ 2007 hodzie i praduhledžvaje pazbaŭleńnie ad simvałaŭ «frankizmu». Ciapier dekret pavinien być uchvaleny kanhresam deputataŭ.
Premjer-ministr krainy Pedra Sančes, jaki pryjšoŭ da ŭłady ŭ sioleta ŭ červieni, raniej zajaŭlaŭ, što pierapachavańnie Franka dapamoža prymiryć ispancaŭ u ich adnosinach da minułaha.
Jak čakajecca, dekret pra pierapachavańnie Franka padtrymaje levaja partyja Podemos i nacyjanalistyčnyja partyi Katałonii i Krainy Baskaŭ. Suprać dekreta źbirajecca hałasavać hałoŭnaja apazicyjnaja siła krainy — Narodnaja partyja Ispanii.
Suprać pierapachavańnia vystupajuć i naščadki Franka, jakija ŭžo nie raz zajaŭlali, što nie pahodziacca pieranosić jaho astanki ŭ familny sklep u Halisii.
