Biełarusam, jakija žyvuć u Varšavie, pačali prychodziać dziŭnyja prapanovy ad čałavieka, jaki nazyvaje siabie Andrejem Maślakovym. Jon pradstaŭlajecca siabram HA «Biełaruski respublikanski sajuz moładzi» i prapanuje padpracoŭku, piša Jeŭraradyjo.
Fota Andreja Maślakova z «Vkontaktie». Kałaž Jeŭraradyjo.
«My chočam stvaryć jačejku BRSM u Varšavie, i nam patrebnyja nadziejnyja ludzi. Sutnaść prostaja: ładzić roznyja mitynhi, padtrymlivać Baćku, pisać roznyja posty, nu i prasoŭvać ekanamičnuju madel u Polščy praź ludziej, ź jakimi my vas paznajomim».
Za heta Andrej Maślakoŭ abiacaje harantavany zarobak u 200 rubloŭ za miesiac i premiju.
Chto jon taki?
Profil Maślakova «VKontaktie» davoli dziŭny. Jon paviedamlaje pra siabie, što naradziŭsia 10 žniŭnia 1978 hoda ŭ Słucku. U siabrach u jaho supracoŭnik Radyjo «Svaboda» Franak Viačorka, aktyvist rucha «Za Svabodu!» Pavieł Batujeŭ, kolišni siabar kryła AHP «Maładyja demakraty», a ciapier varšaŭski student Daniła Barysievič. Ale status «Niet fašizmu v Biełoruśsii! Słava Łukašienko! Žyvi sojuz s Rośsijej!» [arfahrafija zachavanaja. — Jeŭraradyjo] vyklučaje mahčymaść siabroŭstva sa zhadanymi asobami.
Na staroncy jość niekalki fotazdymkaŭ sa ściahami BRSM, ź biełaruskaj dziaržaŭnaj simvolikaj. Na adzin ź ich Maślakoŭ vidavočna pryfatašopiŭ svoj tvar! Pahladzicie, što atrymałasia:
Andrej Maślakoŭ piša pra siabie, što źjaŭlajecca sakratarom jačejki BRSM u pasiołku Akciabrski. Tym samym, dzie naradziłasia Ksienija Dziahielka, aŭtarka chita «My iz dierievni». U razmovie ź Jeŭraradyjo mužčyna paćviardžaje, što pradstaŭlaje Akciabrski BRSM.
Ale sapraŭdnaja sakratarka jačejki BRSM u pasiołku Akciabrski rasčaroŭvaje Jeŭraradyjo: pra Andreja Maślakova jana nikoli nie čuła:
«U nas niama takoha Andreja Maślakova. Sakratarka — heta ja. I śpiecyjalist jašče. I usio. U nas takich ludziej niama ni ŭ štacie, ni ŭ reziervie».
Hramadski aktyvist Andrej Pavuk, jaki žyvie ŭ Akciabrskim, pryhadvaje, što ŭžo sutykaŭsia z Maślakovym:
«Jon dakładna nie z našaha miastečka, prosta vybraŭ jarki majak. Troliŭ, BRSM abahaŭlaŭ. I, zdajecca, śćviardžaŭ, što heta jon pradziusar Dziahielka».
Jačejka BRSM u Varšavie — «heta ekśpierymient»
Maślakoŭ niečakana paćviardžaje Jeŭraradyjo i toje, što nieŭzabavie budzie stvoranaja supołka BRSM u Varšavie:
«Pakul heta sakret, tolki asablivyja ludzi pra heta viedajuć. Chto vam skazaŭ? Pakul nie možam raspavieści, heta ekśpierymient».
Na hetym pierapiska pieraryvajecca.
