Sud Savieckaha rajona ŭ budynku Doma pravasudździa praciahnuŭ razhlad «spravy prafsajuzaŭ». Siońnia, 1 žniŭnia, praciahnuŭsia dopyt śviedkaŭ. Lidara niezaležnaha prafsajuzu REP Hienadzia Fiadyniča i hałoŭnaha buchhałtara REP Ihara Komlika abvinavačvajuć u niaspłacie padatkaŭ u asabliva bujnym pamiery (č.2 art. 243 KK).
Na pačatku pasiedžańnia Hienadź Fiadynič zajaviŭ chadatajnictva ab tym, kab pieršaj dapytali jahonuju ciešču, 81-hadovuju Janinu Barysievič. Žančynie było składana davać pakazańni stojačy, tamu dla jaje prynieśli kresła. Padčas pramovy jana časta spyniałasia i pačynała płakać.
U kastryčniku 2017 hoda na ziamielny ŭčastak u vioscy Suchadoły Dziaržynskaha rajona, jaki naležyć Janinie Barysievič, nakłali aryšt.
«Ja paniaćcia nie maju pra pracu majho ziacia, viedaju jaho tolki jak muža majoj starejšaj dački. Nijakich hrošaj, u tym liku na budaŭnictva lecišča, jon mnie nie davaŭ», — skazała jana.
Muž Janiny Barysievič pamior paśla insultu. Paźniej, u 1993 hodzie, žančyna nabyła na svaje nakoplenyja hrošy ŭčastak i pačała budavać dom praź firmu, jakaja, jak paźniej vyśvietliłasia, pastaviła niajakasnyja materyjały. U vyniku Hienadź Fiadynič dabudoŭvaŭ dom ułasnymi siłami.
Raspaviadajučy pra aryšt dačy, jana raschvalavałasia.
«Hrašyma mnie dapamahaŭ unuk Dzianis, letaś i jaho pačali ciahać u padatkovuju… Dajcie mnie spakojna dažyć! Hetyja vašyja ručki papiery pierakładajuć, a ja svaimi usie žyćcio ŭ ziamli pracuju! Chto daŭ prava čynić biezzakońnie?» — źviarnułasia pažyłaja žančyna da sudździ i admoviłasia adkazvać na dalejšyja pytańni prakurora.
Niahledziačy na skarhi Barysievič na kiepski stan zdaroŭja, dziaržaŭny abvinavaŭca Lilijana Litviniuk praciahnuła zadavać pytańni. Navat kali sudździa źniała ŭdakładniajučaje pytańnie, prakuror patrabavała ad Barysievič adkazu. Prysutnyja ŭ zali aburylisia, sudździa vyniesła zaŭvahu. Tolki paśla taho, jak Hienadź Fiadynič skazaŭ, što zaraz daviadziecca vyklikać chutkuju, śviedcy dazvolili pakinuć zału.
Nastupnym daŭ pakazańni Jury Siakieryn — budaŭnik, jakomu prafsajuz 7 hadoŭ tamu dapamoh viarnuć hrošy, niaspłačanyja dziaržstrukturaj. Jon ža kansultavaŭ Fiadyniča pa budaŭnictvie lecišča, aceńvaŭ, nakolki jakasna pracujuć rabočyja. Fiadyniča jon nazvaŭ svaim «dobrym pryjacielem», adnak nijakaj infarmacyi pra prybytak prafsajuzu z-za miažy jon nie maje.
Fiadynič patłumačyŭ taki admysłovy paradak vykliku śviedkaŭ tym, što siłaviki prosta dapytvali ŭsich zapar ludziej ź jahonaj zapisnoj knižki na mabilnym telefonie.
Śviedka Uładzimir Kandratovič patłumačyŭ, što byŭ siabram REP z 2006 pa 2015 hod, kali pracavaŭ naładčykam stankoŭ na MAZ.
«Ja šukaŭ abarony maich pravoŭ i adzinaja arhanizacyja, jakaja dapamahła — heta prafsajuz REP».
Za miažoj Kandratovič byŭ ŭsiaho dvojčy: na sieminarach u Šviecyi (2006) i Niamieččynie (2011), hrošy atrymlivaŭ ad zamiežnych arhanizataraŭ vyklučna na kišennyja vydatki. Pavodle jahonych słovaŭ, pravozić hrošy praź miažu ad jaho nikoli nie patrabavałasia. Prykładna takija ž śviedčańni daŭ jašče adzin siabar REP Dźmitryj Šuhajeŭ, jaki taksama kansultavaŭ Fiadyniča pa leciščy.
Sakratar pa mižnarodnych pytańniach Biełaruskaha kanhresu demakratyčnych prafsajuzaŭ Aleh Padalinski adrazu zajaviŭ:
«Dapamoha prafsajuzam — heta narmalnaja suśvietnaja praktyka, zamacavanaja kanviencyjaj Mižnarodnaj arhanizacyi pracy. Bolš za toje, niekalki hod tamu vice-premjer Biełarusi braŭ udzieł u pasiadžeńni hetaj arhanizacyi i adznačaŭ, što ŭłady nie buduć čynić pieraškodaŭ prafsajuzam u atrymańni takoj dapamohi».
Jon padkreśliŭ, što dapamoha ad zamiežnych partnioraŭ zaklučałasia mienavita ŭ sumiesnych hrantavych prajektach, dziakujučy jakim byli mahčymyja pajezdki na sieminary pa abmienie dośviedam.
Prakuror zapytała, ci maje Biełaruski kanhres demakratyčnych prafsajuzaŭ rachunak u zamiežnym banku. Padalinski adkazaŭ, što dakładna nie viedaje, ale «imavierna, nie».Paśla dopytu śviedkaŭ sud pierajšoŭ da abviaščeńnia piśmovych materyjałaŭ spravy. Usiaho ŭ joj 11 tamoŭ. Siarod inšaha, prakuror Litviniuk začytała pratakoły ab apieratyŭna-vyšukovaj dziejnaści, ź jakich vynikaje, što siłaviki prasłuchoŭvali kiraŭnikoŭ i čalcoŭ REP.
